भाइ एन्ड्रयूमाथि अनुसन्धानमा प्रहरीलाई सघाउन राजा चार्ल्स तयार

लन्डन  । बेलायतका राजा चार्ल्स तृतीयले आफ्ना भाइ एन्ड्रयू माउन्टब्याटन–विन्डसरविरुद्ध उठेका आरोपको मूल्याङ्कन गरिरहेका बेलायती प्रहरीलाई आवश्यक सहयोग गर्न आफू तयार रहेको बताएका छन् । अमेरिकी न्याय मन्त्रालयले हालै सार्वजनिक गरेको दिवङ्गत यौन दुराचारी जेफ्री एपस्टिनसम्बन्धी नयाँ कागजातहरूमा पूर्वराजकुमार एन्ड्रयूले सन् २०१० मा गोप्य सरकारी सामग्री एपस्टिनलाई पठाएको दाबी गरिएको छ । यसपछि उनीमाथि फेरि गम्भीर छानबिन सुरु भएको छ ।

बेलायती राजतन्त्रविरोधी संस्था रिपब्लिकका प्रमुख ग्राहम स्मिथले सोमबार एन्ड्रयूमाथि सार्वजनिक पदमा दुराचार र आधिकारिक गोप्यताको उल्लङ्घन गरेको आरोप लगाउँदै प्रहरीमा उजुरी दिएका थिए । ‘हामीले उजुरी प्राप्त गरेका छौँ र स्थापित प्रक्रियाअनुसार त्यसको मूल्याङ्कन गर्दैछौँ ।’ थेम्स भ्याली प्रहरीले सीएनएनलाई भनेको छ ।

‘माउन्टब्याटन–विन्डसरको आचरणबारे लगातार बाहिर आइरहेका आरोपप्रति राजा चाल्र्स गहिरो चिन्तित छन् । यदि प्रहरीले औपचारिक रूपमा सहयोग मागेमा हामी पूर्ण रूपमा सहकार्य गर्नेछौँ ।’ यसै दिन बकिङ्घम प्यालेसका प्रवक्ताले भनेका छन् ।

एन्ड्रयूले यसअघि एपस्टिनसँगको सम्बन्धमा कुनै गलत काम नगरेको बताएका थिए । तर नयाँ आरोपबारे उनले सार्वजनिक प्रतिक्रिया दिएका छैनन् । यसबिच बेलायतमा एपस्टिनसँग जोडिएका अन्य उच्च पदस्थ व्यक्तिहरू पनि दबाबमा परेका छन् । पूर्वअमेरिकी राजदूत पिटर म्यान्डेल्सनले गत साता हाउस अफ लड्र्स छोडेका थिए, र प्रहरीले शुक्रबार उनीसँग जोडिएका दुई सम्पत्तिमा छापा मारेको छ । एपस्टिन प्रकरणले फेरि बेलायती राजतन्त्र र राजनीतिक वृत्तलाई विवादमा तानेको छ।