कांग्रेस र देशलाई बदल्ने प्रयासमा गगन थापा र म दृढ छौँ : विश्वप्रकाश

काठमाडौं : नेपाली कांग्रेसको शेरबहादुर देउवा पक्षले कारबाही गरेपछि महामन्त्री विश्वप्रकाश शर्माले कांग्रेस र देशलाई बदल्ने प्रयासमा गगन थापा र आफू दृढ रहेको बताएका छन्।

पार्टी कार्यालय सानेपामा बसेको कांग्रेस केन्द्रीय कार्यसमितिको बैठकले महामन्त्रीद्वय गगनकुमार थापा र विश्वप्रकाश शर्मालाई कारबाही गर्ने निर्णय गरेको थियो। महामन्त्रीद्वय थापा र शर्माले पार्टीको नीति विपरीत कार्य गरेको भन्दै साधारण सदस्यसमेत नरहने गरी निलम्बन गरिएको सहमहामन्त्री मीन विश्वकर्माले जानकारी दिए।

कारबाहीमा परेपछि शर्माले सामाजिक सञ्जालमा लेख्दै भने, मेरो प्रतिक्रिया केवल यत्ति छ– कांग्रेस र देशलाई बदल्ने प्रयासमा गगन थापा र म, दुवै दृढ छौँ। विधान अनुरूपको विशेष महाधिवेशनले देशलाई सही दृष्टिकोण दिएको छ। अब सही नेतृत्व दिनेछ।

यस्तै शर्माले देउवा पक्षसँगको सहमतिका लागि आज बिहान प्रस्तावित ८ बुँदामध्ये कुन बुँदा कांग्रेस र देशको अहितमा थियो र छ भन्दै प्रश्न समेत गरेका छन्।

यस्ता छन् सहमतिका लागि प्रस्तावित गरेका ८ बुँदा
१. विशेष महाधिवेशनको स्वामित्व साझा रूपमा लिने।
२. विशेष महाधिवेशन परिमार्जनसहित पारित प्रस्तावहरू कार्यान्वयन गर्ने।
३. सभापतिले सक्रिय भूमिका निर्वाह नगर्ने, सो क्रममा उम्मेदवारी पत्रमा सभापतिले हस्ताक्षर नगर्ने।
४. उम्मेदवार चयन गर्न संसदीय बोर्ड गठन गर्ने।
५. आगामी निर्वाचनमा एक ढिक्का भएर मैदानमा जाने।
६. कुनैपनी दलसँग गठबन्धन नगरेर नेपाली कांग्रेसले आगामी निर्वाचनमा एक्लै प्रतिस्पर्धा गर्ने  ।
७. नेपाली कांग्रेसका तर्फबाट आगामी निर्वाचनमा प्रधानमन्त्रीको उम्मेदवार घोषणा गरेर जाने।
८. यी सबै कार्य समन्वय र कार्यान्वयन गराउन ५ सदस्यीय संरचना गठन गर्ने। जसमा–कार्यवाहक सभापति र दुई महामन्त्री बाहेक थप दुई नेताहरू रहने।