विदेशी सम्बन्धन कलेजहरूलाई शिक्षामन्त्री पुनको १० बुँदे निर्देशन

काठ्माण्डौ- शिक्षामन्त्री महावीर पुनले विदेशी विश्वविद्यालयको सम्बन्धनमा नेपालमा सञ्चालित कलेजहरूलाई १० बुँदे कडा निर्देशन जारी गरेका छन्। केही कलेजहरूले निर्देशिका उल्लङ्घन गरी विद्यार्थीलाई गुणस्तरीय सेवा नदिएको गुनासो आएपछि मन्त्रालयले यस्तो निर्देशन जारी गरेको हो।

मन्त्री पुनका अनुसार मन्त्रालयको पुस १४ गतेको मन्त्रिस्तरीय निर्णय अनुसार जारी निर्देशनमा विदेशी सम्बन्धनमा उच्च शिक्षा सञ्चालन गर्नेसम्बन्धी निर्देशिका, २०५९ को पूर्ण पालना गर्नुपर्ने, डिसिप्लिन इन्चार्ज (डिआई) को व्यवस्था तत्काल हटाएर विद्यार्थी परामर्श कक्ष स्थापना गर्नुपर्ने उल्लेख छ।

निर्देशनका मुख्य बुँदाहरू:
– कलेजमा शुल्कको पूरा विवरण पारदर्शी रूपमा डिस्प्ले गर्ने र १५ दिनभित्र मन्त्रालयमा प्रमाणित प्रतिलिपि पेस गर्ने।
– कक्षा सञ्चालन तालिका, विद्यार्थी सङ्ख्या र दैनिक सिकाइ क्रियाकलाप सार्वजनिक गर्ने।
– अनुमति प्राप्त कार्यक्रम र स्थानमा मात्र पढाइ सञ्चालन गर्ने।
– वेबसाइटमा अर्को कलेजको कार्यक्रमको प्रचार नगर्ने।
– छात्रवृत्ति पारदर्शी रूपमा वितरण गर्ने र विवरण मन्त्रालयमा पेस गर्ने।
– योग्य शिक्षकबाट मात्र पढाउने।
– गुनासो तथा सुझाव पेटिका राख्ने र नियमित सम्बोधन गर्ने।

निर्देशनमा निर्देशिका र कवुलियतनामाका सर्त उल्लङ्घन गरेमा कलेजको अनुमति जुनसुकै बेला रद्द गर्न सकिने चेतावनी पनि दिइएको छ।