मेस्सी, एमबाप्पे र हालान्ड : को हुन् गोल्डेन बुटको दाबेदार ?

फिफा विश्वकप २०२६मा गोल्डेन बुटको प्रतिस्पर्धा निकै रोमाञ्चक बनेको छ।

ब्राजिलविरुद्ध दुई गोल गर्दै नर्वेलाई क्वार्टरफाइनलमा पुर्‍याएका एर्लिङ हालान्डले गोल्डेन बुटको प्रतिस्पर्धालाई थप चर्काएका छन्।

अमेरिकाको न्युयोर्क न्युजर्सी स्टेडियममा खेलको  ७९औँ र  ९०औँ मिनेटमा गोल गर्दै हालान्डले अर्जेन्टिनाका कप्तान लियोनेल मेस्सी र फ्रान्सका केलियन एमबाप्पेसँग बराबरी गरे।

गोल्डेन बुटको शिर्ष स्थानमा सात गोलसहित एमबाप्पे पहिलो स्थानमा छन्। समान गोल गरेका मेस्सी र हालान्ड एसिस्ट अन्तरका कारण दोस्रो र तेस्रो स्थानमा छन्।

गोल्डेन बुटको रेसमा को–को छन् ?

केलियन एमबाप्पे (फ्रान्स) – ७ गोल, २ असिस्ट

लियोनेल मेस्सी (अर्जेन्टिना) – ७ गोल, ० असिस्ट

एर्लिङ हालान्ड (नर्वे) – ७ गोल, ० असिस्ट

ह्यारी केन (इंग्ल्याण्ड) – ६ गोल, १ असिस्ट

उस्मान डेम्बेले (फ्रान्स) – ४ गोल, २ असिस्ट

मिकेल ओयारजाबल (स्पेन) – ४ गोल, १ असिस्ट

नर्वेका स्ट्राइकर एर्लिङ हालान्ड आफ्नो पहिलो विश्वकपमै उत्कृष्ट लयमा देखिएका छन्। शारीरिक रूपमा बलिया र गोल गर्ने अद्भुत क्षमताका कारण उनी विपक्षी रक्षापंक्तिका लागि ठूलो चुनौती बनेका छन्। नर्वेले प्रतियोगितामा आफ्नो यात्रा लम्ब्याउन सके हालान्ड गोल्डेन बुटका बलिया दाबेदार बन्नेछन्।

अर्जेन्टिनाका कप्तान मेस्सी टोलीको आक्रमणको मुख्य आधार बनेका छन्। उनी निरन्तर गोल गर्दै टोलीलाई अघि बढाइरहेका छन्। अर्जेन्टिना प्रतियोगितामा लामो यात्रा गर्न सफल भए मेस्सीसँग गोल संख्या अझ बढाउने पर्याप्त अवसर हुनेछ। निर्णायक खेलमा प्रभाव पार्ने क्षमता र अनुभव उनका सबैभन्दा ठूला बल हुन्।

फ्रान्सका केलियन एमबाप्पे पनि उत्कृष्ट फर्ममा छन्। बलियो टोली, आक्रामक खेलशैली र लगातार सिर्जना हुने अवसरका कारण उनी अन्य प्रतिस्पर्धीभन्दा केही अघि देखिन्छन्। फ्रान्स प्रतियोगितामा अन्तिम चरणसम्म पुग्ने अपेक्षा गरिएकाले एमबाप्पेसँग थप गोल गर्ने अवसर पनि बढी हुनेछ।

हालको अवस्थालाई हेर्दा एमबाप्पे, मेस्सी र हालान्ड तीनै जना गोल्डेन बुटका प्रमुख दाबेदार हुन्। यद्यपि, टोलीले प्रतियोगितामा कति लामो यात्रा गर्छ भन्ने कुराले अन्तिम विजेता तय गर्ने सम्भावना बढी छ।