कांग्रेसको इतर पक्षले साउन ६ गते काठमाडौंमा वृहत् कार्यक्रम गर्ने

काठमाडौं । नेपाली कांग्रेसको इतर पक्षले साउन ६ गते बृहत् कार्यक्रम गर्ने भएको छ। सम्पर्क कार्यालय चुनदेवीमा बसेको बैठकले बीपी स्मृति दिवसको दिनमा सम्पर्क कार्यालयबाट बृहत् कार्यक्रम हुने नेता मीन विश्वकर्माले बताए।

उनका अनुसार कार्यक्रम काठमाडौंमा हुनेछ। स्थान र कार्य तालिका तय हुन बाँकी रहेको बताए। भोलिकै बैठकबाट १५ औँ महाधिवेशनको कार्य तालिका र सम्पर्क कार्यालयबाट हुने गतिविधिबारे पनि निर्णय लिने बताए।

उनले भने, ‘नेपाली कांग्रेसको एकताका लागि सम्पर्क कार्यालय स्थापना भएको छ। हामी पहिलो एकताको प्रयास गर्छौँ। तर एकताको प्रयास सार्थक बन्न सकेको छैन। एकता भएन भने वैकल्पिक बाटो पनि खोजेर जान सक्ने छलफल भइराखेको छ। त्यसो भएको हुनाले सबै कुराको निष्कर्ष भोलिको बैठकले गर्छ।’

विशेष महाधिवेशनमा नगएका आधा साथी बाहिर भएकाले एकतामा जोड दिएको बताए।

उनले थपे, ‘आयोगले मान्यता दिएको, अदालतले वैधानिकता दिएको कार्यसमितिलाई हामी पनि वैधानिक मान्छौँ, त्यो कार्यसमितिमा छुटेका साथीहरूलाई पनि सँगै लिएर १५ औँ महाधिवेशनलाई एकताको महाधिवेशन गराऔँ भनेका हौँ।’

१५ औँ महाधिवेशनलाई एकताको बनाउन दबाब सिर्जना गर्नका लागि सम्पर्क कार्यालय खोलिएको बताए। पार्टी एकता तर्फ नभई विभाजन तर्फ गइराखेको समेत उनले बताए।