चटकले आएको बालेन सरकार धेरै टिक्दैन : केपी ओली

नेकपा एमालेका अध्यक्ष केपी ओलीले रास्वपाका वरिष्ठ नेता बालेन्द्र शाह (बालेन) नेतृत्वको सरकार धेरै समय नटिक्ने दाबी गरेका छन्।

पार्टी मुख्यालय च्यासलमा आयोजित कार्यक्रममा ओलीले सरकारभित्रै त्यसलाई अस्थिर बनाउने तत्व रहेको जिकिर गरे। उनका अनुसार अहिलेको सरकारलाई बाहिरबाट कसैले ढाल्न आवश्यक नरहेको र अन्ततः आफ्नै कारणले सरकार ढल्ने अवस्था आउनेछ।

उनले अहिलेको सरकार ‘चटक’का आधारमा बनेको भन्दै त्यही आधारमा अन्त्य हुने टिप्पणी गरे। सरकार परिवर्तनको प्रतीक्षा मात्र गरेर बस्न नहुने उल्लेख गर्दै उनले त्यसो गर्दा देश र लोकतन्त्र दुवैमा थप क्षति पुग्ने दाबी गरे।

‘अहिलेको सरकार कसैले नढाले पनि ढाल्ने तत्त्व त्यहीँभित्र छन्। यो सरकार आफैँ ढल्छ, चटकको भरमा आएको हो, चटककै भरमा जान्छ। तर त्यसको प्रतीक्षा गरेर बस्यौँ भने देश बर्बाद भइसक्छ, लोकतन्त्र पनि कमजोर हुन्छ। त्यसैले परिवर्तन पर्खिने विषय होइन,’ ओलीले भने।