अन्तर्राष्ट्रिय सम्मेलनमा सहभागी हुन मन्त्री चौधरी थाइल्याण्ड जाँदै
कृषि, वन तथा वातावरण मन्त्री गीता चौधरी थाइल्याण्डमा आयोजना हुने वातावरण तथा दिगो विकाससम्बन्धी उच्चस्तरीय अन्तर्राष्ट्रिय सम्मेलनमा सहभागी हुने भएकी छन्।
मन्त्री चौधरी यही जुन २९ देखि जुलाई ३ सम्म थाइल्याण्डको बैंककमा आयोजना हुने पाँचदिने अन्तर्राष्ट्रिय सम्मेलनमा सहभागी हुन आज थाइल्याण्ड प्रस्थान गरेकी छिन्।
मन्त्री चौधरी जुन २९ र ३० मा हुने पेरिस सम्झौता र दिगो विकास २०३० को एजेन्डा तालमेललाई सुदृढ पार्ने सातौं विश्वव्यापी सम्मेलनको उच्चस्तरीय खण्डमा सहभागी हुनेछन्। उक्त सम्मेलनमा जलवायु परिवर्तन न्यूनीकरण, पेरिस सम्झौताको कार्यान्वयन तथा दिगो विकास लक्ष्य सँगको सहकार्यलाई अझ मजबुत बनाउने विषयमा उच्चस्तरीय छलफल हुने कार्यक्रम रहेको छ।
यसैगरी जुलाई १ देखि ३ सम्म थाइल्याण्डको बैंककमा आयोजना हुने मन्त्रीस्तरीय वातावरण तथा विकास समितिको नवौं सत्र कार्यक्रममा पनि सहभागिता हुने छिन्।
उक्त मन्त्रीस्तरीय बैठकमा क्षेत्रीय तथा अन्तर्राष्ट्रिय स्तरमा वातावरण संरक्षण, जलवायु अनुकूलन, हरित अर्थतन्त्र र दिगो विकाससँग सम्बन्धित साझा चुनौती तथा समाधानका विषयमा नेपालको तर्फबाट मन्त्री चौधरीले प्रतिनिधित्व गर्नेछिन्।
सम्मेलनमा मन्त्री चौधरीले नेपालको तर्फबाट जलवायु परिवर्तनका असर, हिमाली मुलुकहरूले भोगिरहेका चुनौती, वातावरण संरक्षणका लागि गरिएका प्रयास तथा दिगो विकासका क्षेत्रमा नेपालले लिएको प्रतिबद्धताबारे आफ्नो धारणा राख्नेछिन्।
ट्रेन्डिङ
ताजा समाचार
सम्बन्धित
