वर्षाले कैलालीका किसानलाई राहत

धनगढी । खडेरीका कारण रोपाइँ गर्न र रोपाइँ गरिएको धान जोगाउन समस्या भोग्दै आएका कैलालीका किसानलाई लामो पर्खाइपछि वर्षाले राहत दिएको छ । मङ्गलबार बिहानदेखि परेको वर्षाले किसानलाई राहत पुगेको हो । यहाँ बिहान ३ बजेदेखि निरन्तर मध्यम वर्षा भइरहेको छ । वर्षाको पानीले खेतमा सिँचाइ भएपछि किसान खुसी भएका छन् । उनीहरूले रोपाइँ गर्न अब सहज हुने बताएका छन् । यसैगरी सुकिरहेको धानबालीलाई पनि फाइदा पुगेको कृषक समीक्षा चौधरीले बताइन् । पानी नपर्दा रोपो सुकेर मर्न थालेको उनले उल्लेख गरे ।

मध्य असारसम्म जिल्लामा करिब ४० प्रतिशत मात्र रोपाइँ सम्पन्न भएको छ । जिल्लाभर ६३ हजार हेक्टर जमिनमा धान खेती हुने गरेको कृषि ज्ञान केन्द्र कैलालीका सूचना अधिकारी टेकबहादुर विष्टले जानकारी दिए।