प्रभावकारी र परिणाममुखी आर्थिक कूटनीति सञ्चालन गर्नेछौँ : परराष्ट्रमन्त्री खनाल
काठमाडौं । परराष्ट्रमन्त्री शिशिर खनालले प्रभावकारी र परिणाममुखी आर्थिक कूटनीति सञ्चालन गर्ने बताएका छन् ।
बिहीबारको प्रतिनिधिसभा बैठकमा आगामी आर्थिक वर्षको बजेटमा मन्त्रालयगत उठेका प्रश्नको जवाफ दिँदै उनले यस्तो बताएका हुन् ।
“मुलुकको समृद्धि र विकासका लागि संविधानद्वारा निर्देशित अन्तर्राष्ट्रिय सम्बन्धको ढाँचाभित्र रही दिगो विकासमा योगदान, अति कम विकसित मुलुकबाट स्तरोन्नति, जलवायु परिवर्तन अनुकूलन कार्यमा सहयोग जुटाउने, निर्यात प्रवर्धन, वैदेशिक लगानी, रोजगारी र पर्यटन प्रवर्धनका लागि प्रभावकारी र परिणाममुखी आर्थिक कूटनीति सञ्चालन गर्ने,” परराष्ट्रमन्त्री खनालले बताए ।
विदेशमा बस्ने नेपाली डायस्पोराको हक हितको संरक्षण गर्ने, विकास सहायतालाई राष्ट्रिय प्राथमिकता र प्रणालीमा आबद्ध गर्न समन्वय गर्ने तथा नेपालका अन्तर्राष्ट्रिय प्रतिबद्धताहरू पूरा गर्न नेपालको अन्तर्राष्ट्रिय सम्बन्धलाई केन्द्रित गर्ने उनले जनाए ।
“नेपालको संविधान, परराष्ट्र नीति र अन्तर्राष्ट्रिय सम्बन्धका स्थापित मान्यता प्रति प्रतिबद्ध रही सुशासन र आर्थिक समृद्धि हासिल गर्ने दिशामा नेपाल सरकारले प्राथमिकताका साथ काम गरिरहेको छ,” परराष्ट्रमन्त्री खनालले भने ।
संविधानले संयुक्त राष्ट्रसंघको वडापत्र, असंलग्नता, पञ्चशीलका सिद्धान्त, अन्तर्राष्ट्रिय कानुन र विश्वशान्तिको मान्यतालाई नेपालको परराष्ट्र नीतिको आधारभूत सिद्धान्तको रूपमा स्थापित गरेको उनले स्पष्ट पारे ।
यी सिद्धान्तहरूको आधारमा राष्ट्रको सर्वोपरी हितलाई ध्यानमा राखी स्वतन्त्र र सन्तुलित परराष्ट्र नीति सञ्चालन गरिँदै आएको उनले जनाए ।
“नेपालको संविधानले नेपालको स्वतन्त्रता, सार्वभौमसत्ता, भौगोलिक अखण्डता, राष्ट्रियता, स्वाधीनता, स्वाभिमान, नेपालीको हक हितको रक्षा, सिमानाको सुरक्षा, आर्थिक समुन्नति र समृद्धिलाई राष्ट्रिय हितको रूपमा परिभाषित गरेको छ,” परराष्ट्रमन्त्री खनालले भने ।
संविधानले राष्ट्रिय हितको रक्षा गर्दै सार्वभौमिक समानताका आधारमा अन्तर्राष्ट्रिय सम्बन्ध कायम गरी विश्व समुदायमा राष्ट्रिय सम्मानको अभिवृद्धि गर्नेतर्फ अन्तर्राष्ट्रिय सम्बन्ध निर्देशित हुने मार्गदर्शन गरेको उनले बताए ।
विगतमा भएका सन्धिहरूको पुनरवलोकन गर्दै समानता र पारस्परिक हितको आधारमा सन्धि सम्झौता गर्न संविधानले नीतिगत मार्गदर्शन गरेको पनि उनले बताए ।
ट्रेन्डिङ
सम्बन्धित
