१० खर्ब रुपैयाँ बराबरको ठेक्का खुलाइँदै, सबै वडा कार्यालयसम्म कालोपत्रे सडक पुग्न ९ वर्ष लाग्ने

काठ्माण्डौ- भौतिक पूर्वाधार तथा यातायात मन्त्री सुनिल लम्सालले पूर्वाधार विकास मन्त्रालयले चालु आर्थिक वर्षमा करिब १० खर्ब रुपैयाँ बराबरको ठेक्का (टेन्डर) आह्वान गर्ने बताएका छन्।

प्रतिनिधि सभामा विनियोजन विधेयकमाथिको मन्त्रालयगत छलफलमा उठेका प्रश्नहरूको जवाफ दिँदै मन्त्री लम्सालले मन्त्रालयको वार्षिक बजेट २ खर्ब ८६ अर्ब रुपैयाँ मात्रै रहे पनि तीन वर्षको योजनालाई एकैपटक कार्यान्वयन गर्न ठेक्का प्रक्रिया अघि बढाइएको जानकारी दिए।

उनका अनुसार ठेक्का आह्वान गर्दा चालु आर्थिक वर्षकै दररेटलाई आधार बनाइनेछ भने मूल्यवृद्धिको अवस्थालाई ध्यानमा राख्दै स्वतः मूल्य समायोजनको व्यवस्था गरिनेछ।

मन्त्री लम्सालले चालु वर्षको बजेट अपेक्षाकृत कम देखिनुको मुख्य कारण पहिलो ६ महिना ठेक्का प्रक्रियामै खर्चिनु रहेको बताए। उनका अनुसार सामान्यतया तीन वर्षसम्म लाग्ने ठेक्का प्रक्रिया एकैपटक गर्दा २० देखि २२ महिना लाग्ने काम ६ देखि ७ महिनामै सम्पन्न हुने र यसले कार्यान्वयनको बाँकी समय बचत गर्नेछ।

यस्तै, उनले देशभरका सबै वडा कार्यालयसम्म कालोपत्रे सडक पुर्‍याउन अझै ९ वर्ष लाग्ने बताएका छन्। यसका लागि मन्त्रालयले ‘३–३–३ योजना’ लागू गरेको जानकारी दिँदै उनले सडक पूर्वाधार विस्तारलाई चरणबद्ध रूपमा अघि बढाइने बताए।

उनका अनुसार हालसम्म सडक ट्र्याक नै नखुलेका क्षेत्रमा पहिलो ३ वर्षभित्र ट्र्याक खोलिनेछ। त्यसपछि ट्र्याक खुलेका स्थानमा अर्को ३ वर्षभित्र ग्राभेल सडक निर्माण गरिनेछ भने हाल ग्राभेल भएका सडकलाई थप ३ वर्षभित्र कालोपत्रे गरिनेछ।

यस आधारमा अहिले सडक ट्र्याकसमेत नपुगेका स्थानमा आगामी ९ वर्षभित्र मात्रै कालोपत्रे सडक निर्माण सम्पन्न हुने मन्त्री लम्सालले स्पष्ट पारे।

उनले मन्त्रालयले धेरै जनसंख्याले प्रयोग गर्ने सडक तथा बाटोलाई पहिलो प्राथमिकतामा राखेर योजना कार्यान्वयन गरिरहेको समेत जानकारी दिए।