परराष्ट्रमन्त्री खनाल चीन भ्रमणमा जाने

काठमाडौं : परराष्ट्रमन्त्री शिशिर खनाल चीन भ्रमणमा जाने भएका छन् । परराष्ट्र मन्त्रालयका अनुसार भ्रमणको आन्तरिक तयारी भइरहेको छ भने भ्रमणको मिति र विस्तृत तालिका छिट्टै सार्वजनिक गरिनेछ । खनालले गएको सातामात्रै भारतको तीनदिने औपचारिक भ्रमण गरेका थिए ।

बुधबार मन्त्रालयमा आयोजित सञ्चारकर्मीसँगको अन्तरक्रियामा मन्त्री खनालले राष्ट्रिय हितका विषयमा सरकार, राजनीतिक दल, राज्यका निकाय तथा सञ्चार क्षेत्रबीच साझा धारणा आवश्यक रहेको बताए ।

उनले विदेशस्थित नेपाली नियोगमा आवश्यकताअनुसार जनशक्ति र पूर्वाधार सुदृढ गर्ने, परराष्ट्र मामिला अध्ययन प्रतिष्ठानलाई थप प्रभावकारी बनाउने तथा राहदानीको बायोमेट्रिक प्रणालीमा देखिएका चुनौती समाधान गर्ने योजना रहेको जानकारी दिए ।

आफ्नो हालैको भारत भ्रमण उपलब्धिमूलक रहेको उल्लेख गर्दै खनालले द्विपक्षीय हितका विषयमा भारतीय समकक्षीसँग सकारात्मक छलफल भएको उल्लेख गरे ।