बजेट संविधान विपरीत छैन : अर्थमन्त्री वाग्ले

काठमाण्डौ – अर्थमन्त्री डा. स्वर्णिम वाग्लेले सरकारले समतलाई केन्द्रमा राखेर आउँदो आर्थिक वर्षको बजेट ल्याएको दाबी गरेका छन् ।

प्रतिनिधिसभाको आजको बैठकमा सांसदहरूले उठाएका प्रश्नको जवाफ दिँदै अर्थमन्त्री वाग्लेले समता र सामाजिक न्यायलाई बजेटको केन्द्रविन्दु बनाइएको दाबी गरेका हुन् ।

विपक्षी दलहरूले संविधानको मर्म विपरीत बजेट आएको भन्ने आरोपलाई अर्थमन्त्रीले खण्डन गरे । उनले बजेटमा आर्थिक वृद्धि र समानताको सन्तुलनलाई प्राथमिकता दिएको दाबी गरे । समन्यायिक समुन्नति र समृद्धिलाई लक्ष्य बनाएको उनको भनाइ छ ।

बजेटमा समाजवाद शब्द स्पष्ट रूपमा उल्लेख नभए पनि समताको एजेन्डालाई व्यावहारिक रूपमा कार्यान्वयन गर्ने प्रयास बजेटमार्फत गरिएको अर्थमन्त्री वाग्लेले उल्लेख गरे । सरकारका नीति, कार्यक्रम, बजेटका सिद्धान्त तथा प्राथमिकताबीच उच्चस्तरको सङ्गति रहेको उनको दाबी छ ।

अर्थमन्त्रीले विपक्षी दलहरूलाई आफ्नो पार्टीको एजेन्डा जस्तो बजेट आएन भनेर गुनासो गर्न छुट रहेको बताए ।