अन्तरव्यवस्थापिका मञ्चको नौबुँदे सन्देशपत्र जारी

काठमाडौं । अन्तरव्यवस्थापिका मञ्चको ११औँ सम्मेलनबाट नौबुँदे सन्देशपत्र जारी गरिएको छ । शनिबार र आइतबार (जेठ २३–२४) कैलालीको टीकापुरमा आयोजित सम्मेलनबाट नौबुँदे सन्देशपत्र जारी गरिएको हो ।

सन्देशपत्रमा प्रतिनिधिसभाका सभामुख डोलप्रसाद अर्याल, राष्ट्रियसभाका अध्यक्ष नारायणदाहाल, प्रदेशका सभामुखसहितको हस्ताक्षर छ ।

तहगत व्यवस्थापिकाबीच सहकार्य र अन्तरआबद्धतालाई सूचना प्रविधियुक्त बनाउन संघीय संसद् तथा सबै प्रदेशसभाहरूले डिजिटल पार्लियामेन्ट प्रणाली स्थापना गरिने त्यसमा उल्लेख छ ।

आउँदो आर्थिक वर्षभित्र संघीय संसद् र प्रदेशसभाबाट आवश्यक कानुनी व्यवस्थासहित संसदीय बजेट कार्यालय स्थापनाको कार्य अघि बढाइने जनाइएको छ ।

सरकारको नीति तथा कार्यक्रम, पूर्वबजेट छलफल एवम् संसदीय बजेट निर्माण कार्यलाई प्रभावकारी र नतिजामूलक बनाउन उक्त कार्यालय स्थापना गर्न लागिएको हो ।