परराष्ट्रमन्त्री खनालको भारत भ्रमण एक दिन अघि सर्यो, शुक्रबार दिल्ली जाने
काठमाडौं । परराष्ट्रमन्त्री शिशिर खनाल शुक्रबार (जेठ २२ गते) भारत भ्रमणमा जाने भएका छन् । उनले जेठ २२ गतेदेखि २४ गतेसम्म भारत भ्रमण गर्ने परराष्ट्र मन्त्रालयले जनाएको हो ।
यसअघि परराष्ट्रमन्त्री खनाल जेठ २३ गते भारत भ्रमणमा जाने तयारी भइरहेको थियो । तर, अन्तिम समयमा भ्रमण एक दिनअघि सारिएको हो ।
“भारतका विदेशमन्त्री डा. एस. जयशंकरको निमन्त्रणामा परराष्ट्रमन्त्री शिशिर खनालले जुन ५ देखि ७, २०२६ सम्म भारतको औपचारिक भ्रमण गर्दै हुनुहुन्छ,” परराष्ट्र मन्त्रालयले बिहीबार जारी गरेको विज्ञप्तिमा भनिएको छ ।
भ्रमणको क्रममा परराष्ट्रमन्त्री खनालले नयाँ दिल्लीमा भारतका विदेशमन्त्री डा. जयशंकरसँग औपचारिक भेटवार्ता गर्ने कार्यक्रम छ ।
दुवै पक्षले व्यापार, लगानी, कनेक्टिभिटी, ऊर्जा र जनता–जनता सम्बन्धलगायत प्रमुख क्षेत्रहरूमा सहयोग अभिवृद्धि गर्ने उद्देश्यले पारस्परिक हितका विषयमा छलफल गर्ने परराष्ट्रले जनाएको छ ।
“यो भ्रमणले नेपाल र भारतबीचको स्थायी र बहुआयामिक द्विपक्षीय सम्बन्धलाई अझ सुदृढ बनाउनेछ,” परराष्ट्रले भनेको छ ।
परराष्ट्रमन्त्री आइतबार (जेठ २४ गते) काठमाडौं फर्कने कार्यक्रम छ ।
ट्रेन्डिङ
सम्बन्धित
