एसियन गेम्स छनोट : मलेसियाविरुद्ध ब्याटिङ गर्दै नेपाल

काठमाडौं । नेपालले एसियन गेम्स पुरुष क्रिकेट छनोटअन्तर्गत समूह चरणको अन्तिम खेलमा मलेसियाविरुद्ध पहिला ब्याटिङ गर्ने भएको छ । सिंगापुर नेसनल क्रिकेट ग्राउन्डमा मलेसियाका कप्तान सयद अजिजले टस जितेर नेपाललाई ब्याटिङको निम्तो दिएका हुन् ।

यो खेलबाट समूह ‘ए’को विजेता र उपविजेताको टुंगो लाग्नेछ । खेल जित्ने टोली समूह विजेता हुनेछ । पराजित हुने टोली उपविजेता बन्नेछ ।

पहिलो खेलमा दुवै टोलीले चीनलाई हराएका थिए । नेपालले २२१ रनले पराजित गरेको थियो । मलेसिया नौ विकेटले विजयी भएको थियो । नेपाल र मलेसिया दुवैले एसियन गेम्समा स्थान पक्का गरिसकेका छन् ।

नेपाल र मलेसियाबीच हालसम्म १० ट्वान्टी–२० अन्तर्राष्ट्रिय क्रिकेट खेल भएका छन् । यसमध्ये नेपालले नौ जित र एक हारको नतिजा निकालेको छ ।