सेयर बजार २७ अंकले घट्यो

काठमाडौं। सरकारले आउँदो आर्थिक वर्षको बजेट ल्याएपछिको सेयर बजार नकारात्मक देखिएको छ ।

अर्थमन्त्री स्वर्णिम वाग्लेले शुक्रबार (जेठ १५) संघीय संसद्को संयुक्त बैठकमा प्रस्तुत गरेको बजेटप्रति लगानीकर्ता चिढिएका छन् । यसको असरस्वरूप सोमबार (जेठ १८) सेयर बजार करिब २७ अंकले घटेको छ । सुरुआतदेखि नै नकारात्मक रहेको बजार अन्तिम समयमा २६.७२ अंकले घटेको हो । योसँगै बजार २७५५.३७ विन्दुमा झरेको छ ।

यस दिन पाँच अर्ब ६१ करोड ४३ लाख रुपैयाँबराबरको सेयर किनबेच भएको छ । एक करोड ३३ लाख ८३ हजार ८१६ कित्ता सेयर ६३ हजार ७१९ पटकमा किनबेच भएको नेपाल स्टक एक्सचेन्ज (नेप्से)ले जनाएको छ ।

बजार नकारात्मक रहँदा ३५ कम्पनीको मात्र सेयर मूल्य बढेको छ । २३३ कम्पनीको सेयर मूल्य घटेको छ ।

नेपाल रिइन्स्योरेन्स लिमिटेड, कालिञ्चोक हाइड्रो, सिटिजन बैंक डिबेन्चर, सेन्ट्रल फाइनान्स, सिभिल बैंक डिबेन्चर उच्च कमाउने शीर्ष स्थानमा रहे ।

समूहगत सूचकतर्फ नन लाइफ इन्स्योरेन्स १.३७ र अदर इन्डेक्स ३.३६ प्रतिशतले बढेको छ । बाँकी ११ समूह सूचक घटेका छन् ।