एक्लो माननीयलाई नहेपियोस् :महावीर पुन

काठमाडौं । स्वतन्त्र सांसद महावीर पुनले आफूलाई बोल्नका लागि दिइएको ५ मिनेटको समय स्वीकार्य नभएको बताएका छन् ।

अरु सांसदहरूलाई १०-२० मिनेट दिँदा आफूलाई ५ मिनेट दिइएको भन्दै उनले रोस्ट्रमबाट असन्तुष्टि जनाए ।

“एक्लो माननीय भनेर हेला नगरियोस् । किनभने अरुले १०-२० मिनेट पाउँदाखेरी मलाई ५ मिनेट नदिने ? म एक्लो छैन । तपाईंहरूको कुनै पनि पार्टीको सदस्यहरूको भन्दा मेरो समर्थकहरू धेरै छन् नेपालमा । साँच्चिकै पत्याउनुहुन्न भने जनमत लिनुहोस्,” सांसद पुनले भने, “जनमत लिनुहोस् बाहिर गएर । म एक्लो छैन मेरो साथमा सारा नेपालीहरू छन् । सबैले चिन्छन्, बच्चा बच्चाहरूले चिन्छन् । टोल टोलमा चिन्छन् बस्ती बस्तीमा चिन्छन् । त्यसकारण मलाई स्वीकार्य छैन ।”