अपराजित रहँदै सेमिफाइनलमा नेपाल, अब श्रीलंकासँग खेल्ने

काठमाडौं । छैटौँ एसियन बिच गेम्स २०२६ अन्तर्गत समूह ‘बी’को अन्तिम खेलमा नेपालले बंगलादेशलाई हराएको छ । नेपालले बंगलादेशलाई ३८–३६ ले पराजित गरेको हो ।

यो जितसँगै नेपालले समूह ‘बी’को विजेताका रूपमा सेमिफाइनल खेल्ने भएको छ । नेपाल समूहमा अपराजित रहँदै सेमिफाइनलमा पुगेको हो । नेपालले अब श्रीलंकाको सामना गर्नेछ ।

बंगलादेशविरुद्ध नेपालले पहिलो हाफमा १९–१७ ले अग्रता बनाएको थियो । दोस्रो हाफमा अग्रतालाई कायम राख्दै नेपालले जित दर्ता गरेको हो ।

नेपालले समूह चरणको पहिलो खेलमा चाइनिज ताइपेईलाई ४८–३२ ले हराएको थियो । नेपालले समूह चरणको दोस्रो खेलमा थाइल्यान्डलाई ४९–३३ ले पराजित गरेको थियो ।