नेपाल तालिम तथा रोजगार व्यवसायी महासंघ सुदूरपश्चिम प्रदेशको अध्यक्षमा झुम अधिकारी निर्वाचित

धनगढी । नेपाल तालिम तथा रोजगार व्यवसायी महासंघ, सुदूरपश्चिम प्रदेशको दोस्रो अधिवेशनबाट झुम अधिकारी सर्वसम्मत रूपमा अध्यक्षमा निर्वाचित भएका छन्।

धनगढीस्थित होटल डिभोटीमा शनिबार सम्पन्न अधिवेशन महासंघका निवर्तमान अध्यक्ष प्रमोद पाठकको अध्यक्षतामा सम्पन्न भएको थियो। कार्यक्रममा सिटिइभिटी प्रदेश कार्यालय धनगढीका उपनिर्देशक देव सिंह धामी प्रमुख अतिथि तथा महासंघका केन्द्रीय सदस्य सुजित शर्मा अतिथिका रूपमा उपस्थित थिए।

सर्वसम्मत रूपमा चयन गरिएको नयाँ कार्यसमितिको उपाध्यक्षमा राधिका साउँद, सचिवमा प्रकाश छेडाल, सह–सचिवमा शिव बुढा र कोषाध्यक्षमा  सपना रोकाया निर्वाचित भएका छन्।

नवनिर्वाचित अध्यक्ष अधिकारीले महासंघमार्फत सुदूरपश्चिम प्रदेशमा दक्ष जनशक्ति उत्पादन तथा रोजगारीका क्षेत्रमा उल्लेखनीय परिवर्तन ल्याउने गरी काम गर्ने प्रतिबद्धता व्यक्त गरेका छन्।