पार्टी पुनर्गठनमा जुटिन् भण्डारी

काठमाडौं- एमाले पूर्व उपाध्यक्ष विद्यादेवी भण्डारी पार्टी पुनर्गठनमा थप सक्रिय भएकी छिन् ।

अध्यक्ष केपी शर्मा ओली संसदीय राजनीतिमा पराजयसँगै एमालेभित्र विशेष महाधिवेशनको दबाब अभियान सञ्चालन भइरहेको छ।

यस्तो अवस्थामा भण्डारी पार्टी पुनर्गठनमा सक्रिय बनेकी हुन् । यसका लागि उनले शुक्रबार एमालेका पदाधिकारी तथा जनवर्गीय संगठनका प्रतिनिधिहरूसँग छलफल गरेकी छिन् ।

भण्डारीले १४ जनवर्गीय संगठनका प्रतिनिधि र पदाधिकारीसँग छलफल गरेकी हुन् । उक्त छलफलमा एमाले सचिव भानुभक्त ढकाल पनि उपस्थित भएका छन् ।

एमाले अध्यक्ष केपी शर्मा ओलीले पूर्व उपाध्यक्ष  भण्डारीले सक्रिय राजनीतिमा आउनका लागि फाउण्डेसनको मञ्च प्रयोग गरेको भन्दै आफू निकट नेता कार्यकर्तालाई त्यस्ता गतिविधिमा संलग्न नहुन निर्देशन दिएका थिए ।

ढकालले पनि फाउण्डेसन मार्फत भण्डारीले गरेका सक्रिय राजनीति गतिविधिको विरोध गर्दै आएका थिए । २०८२ असार ३१ मा फाउण्डेसनले हिरक जयन्ती व्यवस्थापन समिति बनाएको थियो ।

उक्त समिति सार्वजनिक कार्यक्रममा ढकाल अनुपस्थित थिए । समितिले सार्वजनिक गरेको सदस्यको विवरणमा उनको नाम उल्लेख गरिएको थिएन ।

अध्यक्ष केपी शर्मा ओली संसदीय राजनीतिमा पराजित भएसँगै एमालेभित्र पार्टी पुनर्गठनमा भण्डारी फेरि सक्रिय बनेकी छिन् ।

पुनर्गठनमा भण्डारीको सक्रियता र अध्यक्ष ओली कमजोर बनिरहेको परिस्थितिमा सचिव ढकाल उक्त फाण्डेसनले आयोजना गर्न लागेको हिरक जयन्ती सफल पार्ने छलफलमा उपस्थित भएका हुन् ।

भण्डारीले २०८२ असार १५ मा सक्रिय राजनीतिमा आउने औपचारिक घोषणा गरेकी थिइन् । यद्यपी एमालेले उनको सदस्यता नवीकरण नगरेपछि उनी सक्रिय राजनीतिमा फर्किन सकिनन् ।

आफू माझ किराँतकी छोरी भएको भन्दै एमालेको सक्रिय राजनीतिमा आउन कसैले रोक्न नसक्ने जिकिर उनले गरेकी थिइन् । पार्टीभित्र नयाँ नेतृत्व खोजी भइरहेका बेला भण्डारीले फेरि सक्रियता देखाएकी हुन् ।