प्रधानमन्त्री कप: आसिफको दोहोरो शतक, ११ रनले चुके विनोद

काठमाडौं- विभागीय टिम सशस्त्र प्रहरी बलको एपीएफ क्लबबाट प्रधानमन्त्री कप एकदिवसीय क्रिकेट प्रतियोगिता खेलिरहेका राष्ट्रिय क्रिकेट टोलीका विकेटकिपर आसिफ शेखले मधेस प्रदेशविरुद्ध दोहोरो शतक प्रहार गरेका छन् । आसिफ प्रतियोगिताको इतिहासमा दोहोरो शतक प्रहार गर्ने पहिलो खेलाडी बने ।

उनले मधेसविरुद्ध १४२ बलमा २०८ रनको शतकीय इनिङ खेलेका हुन् । दोहोरो शतक बनाउने क्रममा उनले १५ चौका र १७ छक्का प्रहार गरे । उनले दोस्रो विकेटका निम्ति कप्तान रोहित पौडेलसँग १४५ रनको शतकीय साझेदारी गरेका थिए ।

सोमबार (चैत ३०) जनकपुरधाममा भएको खेलमा आसिफको दोहोरो शतकको मद्दतमा एपीएफले मधेससामु ३९१ रनको विशाल लक्ष्य प्रस्तुत गरेको छ । एपीएफले निर्धारित ५० ओभरमा पाँच विकेट गुमाएर ३९० रन बनाएको हो ।

यसै दिन विभागीय टिम त्रिभुवन आर्मी क्लबका कप्तान विनोद भण्डारी दोहोरो शतक बनाउनबाट ११ रनले चुके । वीरगन्जमा भएको खेलमा विनोदले कोसी प्रदेशविरुद्ध १८९ प्रहार गरेका हुन् । १५० बल खेलेका उनले २१ चौका र पाँच छक्का प्रहार गरे । उनले दोस्रो विकेटका निम्ति भीम सार्कीसँग १४८ रनको शतकीय साझेदारी गरेका थिए ।

विनोदको शतकमा आर्मीले कोसीलाई ३६३ रनको लक्ष्य दिएको छ । आर्मीले ५० ओभरमा आठ विकेट गुमाएर ३६२ रन बनाएको हो ।