डा. गुणाकर भट्ट राष्ट्रिय योजना आयोगको उपाध्यक्ष नियुक्त

काठमाडौं, २४ चैत । सरकारले डा. गुणाकर भट्टलाई राष्ट्रिय योजना आयोगका उपाध्यक्ष नियुक्त गरेको छ ।

केपी शर्मा ओली नेतृत्वको सरकारले नेपाल राष्ट्र बैंकको गभर्नर बन्नबाट रोकेका भट्टलाई बालेन्द्र शाह नेतृत्वको सरकारले राष्ट्रिय योजना आयोगका उपाध्यक्ष नियुक्त गरेको हो ।

तत्कालीन सत्तागठबन्धनको प्रमुख साझेदार नेपाली काँग्रेसका सभापति शेर बहादुर देउवाले गभर्नर बनाउने नाममा राष्ट्र बैंकको कार्यकारी निर्देशकबाट राजिनामा दिन लगाएपनि तत्कालीन प्रधानमन्त्री ओली र देउवापत्नी डा. आरजु राणाले विभिन्न जालझेल गर्दै भट्टलाई रोकेका थिए । ओलीकै निर्देशनमा तत्कालीन कार्यवाहक गभर्नर डा. निलम तिम्सिना ढुंगानाले  भट्टको राजीनामा स्वीकृत गरिनन् ।

त्यसपछि गभर्नर सिफारिस समितिका सदस्य विश्व पौडेललाई सिफारिस समितिबाट राजिनामा दिन लगाएर पौडेललाई देउवाकै सिफारिसमा ओलीले गभर्नर नियुक्त गरेका थिए ।

राष्ट्र बैंकमा रहँदा उनले कर्जा सूचना केन्द्र अध्यक्ष, धितोपत्र बोर्ड सञ्चालक तथा ग्रामीण विकास बैंक सञ्चालक भएर काम गरेका भट्टले वेन स्टेट युनिभर्सिटी अमेरिकाबाट अर्थशास्त्रमा विद्यावारिधि गरेका छन् । उनले ‘फाइनान्सियल डेभलपमेन्ट एन्ड हेल्थ क्यापिटल एकुमुलेसन’ शीर्षकमा सन् २०१३ मा विद्यावारिधिको अनुसन्धान सम्पन्न गरेका थिए ।

उनले अमेरिकाको मासाच्युसेट्सको विलियम्स कलेजबाट स्नातकोत्तर गरेका थिए । त्रिभुवन विश्वविद्यालयमा समेत उनले अर्थशास्त्रमा सर्वोत्कृष्ट अंक हासिल गरी स्वर्ण पदक हासिल गरेका थिए ।

योजना आयोग उपाध्यक्ष नेपाल सरकार तथा प्रधानमन्त्रीको मुख्य आर्थिक सल्लाहकार पनि हो । सरकारका योजना निर्माण, अनुगमन र मूल्यांकनसम्मका काम यो निकायबाट हुने गर्छन् ।

उनी अर्थशास्त्र, वित्त र विकासमा केन्द्रित रही अनुसन्धानात्मक लेखसमेत प्रकाशन गर्दै आइरहेका छन् । विगतमा राजस्व परामर्श समितिमा रहेर काम गरेको अनुभव समेत उनीसँग छ । साथै, डा. प्रकाशशरण महत अर्थमन्त्री हुँदा उनी मन्त्रालयको अवैतनिक प्रमुख आर्थिक सल्लाहकारको भूमिकामा रहेर काम गरेका छन् ।

राष्ट्र बैंक अनुसन्धान विभाग, नियमन विभाग लगायत महत्त्वपूर्ण विभागमा रहेर काम गरेका डा. भट्ट नेपालका एक प्रतिष्ठित अर्थशास्त्री मानिन्छन् । योजना आयोगमा काम गर्दैगर्दा भट्टसामु लथालिङ्ग विकास प्रशासन सम्हाल्नुपर्ने चुनौती छ ।