नेपालका आठ खेलाडीले इयू टी–२० बेल्जियम लिग खेल्ने

काठमाडौं : इयू टी–२० बेल्जियम लिगमा नेपालबाट आठ खेलाडीले प्रतिस्पर्धा गर्ने भएका छन् । जसमा प्रायः राष्ट्रिय टिमका खेलाडी छन् भने इशान पाण्डे सिनियर राष्ट्रिय टोलीका सदस्य होइनन् ।

नेपालबाट सन्दीप लामिछाने लिएज रेड लायन्समा प्रि अक्सनमा नै अनुबन्ध भइसकेका थिए । त्यस्तै दिपेन्द्रसिंह ऐरी पनि यसअघि नै जेबी ब्रुजमा अनुबन्ध भइसकेका छन् । मंगलबार भएको अक्सनबाट नेपालका अन्य ६ खेलाडी विभिन्न टिममा अनुबन्ध भएका हुन् ।

जसमा कप्तान रोहित पौडेल ग्लेन्ट ग्लाडिएटर्समा अनुबन्ध भएका हुन् । नेपाली राष्ट्रिय टिमका विकेटकिपर ब्याटर आसिफ शेख आन्थ्रोप एंकर्समा अनुबन्ध भएका हुन् । त्यस्तै, गुल्सन झा, इशान पाण्डे, अनिलकुमार साह र ललितनारायण राजवंशी जेबी ब्रुजमा अनुबन्ध भएका हुन् ।

नेपाल प्रिमियर लिग (एनपीएल) को टिम जनकपुर बोल्ट्सको लगानीकर्ता  ड्रिम्स स्पोट्र्सकै लगानी रहेको टिम हो जेबी ब्रुज । ब्रजले नेपाली खेलाडीलाई बेल्जियमका प्रमुख ५ शहरको नाममा नामाकरण गर्दै ५ टिमले यस लिगमा सहभागिता जनाउने छन् । यो प्रतियोगिता जुन ६ देखि १४ सम्म हुनेछ । यस प्रतियोगिताको लागि नेपालबाट २२ जना खेलाडीले नाम दर्ता गराएका थिए । जसबाट आठ जना खेलाडीले लिगमा चार वटा फरक टिमबाट खेल्ने छन् ।