प्रतिनिधिसभा चुनावमा विजयी हुँदा १२ जनालाई ५० हजारभन्दा धेरै मत प्राप्त

काठमाण्डौ- यस पटकको प्रतिनिधि सभा चुनावमा १२ जना उम्मेदवारले ५० हजार भन्दा धेरै मत पाएर विजयी भएका छन् । ५० हजार मत कटाउने सबै राष्ट्रिय स्वतन्त्र पार्टी (राश्वपा) का उम्मेदवार हुन् । निर्वाचन आयोगका अनुसार झापा २ मा इन्दिरा राना मगरले ६० हजार ११० र झापा ५ मा बालेन शाहले ६८ हजार ३४८ मत प्राप्त गरेका छन् ।

यस्तै मोरङ ६ मा रुबिना आचार्यले ५५ हजार ५१३, सुनसरी २ मा लालविक्रम थापाले ५७ हजार ३४८, काभ्रे २ मा बदनकुमार भण्डारीले ५३ हजार ३४४ मत पाएका छन् ।

यस्तै चितवन १ मा हरि ढकालले ५८ हजार २०८, चितवन २ मा रवि लामिछानेले ५४ हजार ४०२, चितवन ३ सोविता गौतमले ५९ हजार २७७, नवलपरासी (बर्दघाट सुस्ता पूर्व) मा राजन गौतमले ५० हजार ९४५, रूपन्देही १ मा सुनिल लम्सालले ५४ हजार ८४५, रूपन्देही २ मा सुलभ खरेलले ५६ हजार ५५० र रुपन्देही ३ मा डा लेखजंग थापाले ५८ हजार ८१४ मत प्राप्त गरेका छन्।

धेरै मत पाउने मध्ये रास्वपाका वरिष्ठ नेता बालेनले एमाले अध्यक्ष तथा पूर्वप्रधानमन्त्री केपी शर्मा ओली, पूर्व उपसभामुख इन्दिरा राना मगरले पूर्वसभामुख देवराज घिमिरेलाई र रास्वपाकी रुबिना आचार्यले नेपाली कांग्रेसका नेता शेखर कोइरालालाई पराजित गरेका हुन् ।

यस्तै सुलभ खरेलले एमाले उपाध्यक्ष तथा पूर्वमन्त्री विष्णु पौडेललाई र सोविता गौतमले भरतपुर महानगरपालिकाकी पूर्व मेयर रेणु दााहललाई पराजित गरेका हुन् ।