कैलाली १ मा ५० दशमलव ५५ प्रतिशत मत खस्यो

टीकापुर । कैलाली क्षेत्र नम्बर १ मा ५० दशमलव ५५ प्रतिशत मत खसेको छ । निर्वाचन अधिकृत देवराज भारतीका अनुसार यस क्षेत्रमा ५४ हजार ८४४ मत खसेको हो ।

यस निर्वाचन क्षेत्रमा २३ वटा वडाका एक लाख आठ हजार ४९१ मतदाता छन् । अधिकृत भारतीका अनुसार २३ वटै वडाका सबै मतदान केन्द्रमा गाडी पुगिसकेको र राति ८ः०० बजेसम्म मतपेटिका सङ्कलन भइसक्ने बताए ।

मतपेटिका सङ्कलन भइसकेपछि सर्वदलीय बैठक गरी मतगणना सुरु गरिनेछ । मतगणनाका लागि टीकापुरस्थित सीटी हलमा बत्ती, माइक, तारजाली, सीसी क्यामेरा लगायतको व्यवस्था भैसकेको भारतीले बताए ।

यस क्षेत्रमा नेकपा (एमाले) बाट द्वारिकाप्रसाद न्यौपाने, नेपाली काँग्रेसबाट जनकराज चौधरी, नेपाली कम्युनिस्ट पार्टीबाट रामलाल डगौरा थारु, राष्ट्रिय स्वतन्त्र पार्टीबाट कोमल ज्ञवाली, राप्रपाबाट लोकेन्द्र कुँवर लगायतका १५ जना उम्मेदवार छन्।

टीकापुर–१ मा ४६ दशमलव ४३ प्रतिशत मत खस्यो

मतदाताको हिसावले नेपालमा सबैभन्दा बढी मतदाता भएको टीकापुर नगरपालिका –१ मा ४६ दशमलव ४३ प्रतिशत मत खसेको छ । २२ हजार ९०९ मतदाता रहेको यस वडामा दश हजार ६३८ मत खसेको हो ।

तीनवटा मतदानस्थल भएको यस वडाका खड्ग स्मृति माविमा चार हजार २३१ मत, वीरेन्द्र विद्या मन्दिर मावि केन्द्रमा तीन हजार ६३७ र टीकापुर बुहुमखी क्याम्पस केन्द्रमा दुई हजार २ हजार ७७० मत खसेको छ ।

अघिल्ला निर्वाचनको तुलनामा कम मत खसे पनि यस वडाको मतलाई यहाँको निर्वाचनमा निर्णायक मान्ने गरिएको छ । निर्वाचन आयोगको विवरणअनुसार टीकापुर नगरपालिका –१ पछि २० हजार ८४७ मतदाता रहेका छन् ।