बीबीसीको डकुमेन्ट्रीबारे तत्कालीन आईजी चन्द्रकुवेर खापुङ- जाँचबुझ आयोगले मिडिया ट्रायल गरेको हुनसक्छ

काठमाडौं । अन्तर्राष्ट्रिय समाचार संस्था बीबीसी नेपाली सेवाले भदौ २३ र २४ को जेन–जी आन्दोलनसँग सम्बन्धित रहेर तयार पारेको डकुमेन्ट्रीलाई तत्कालीन प्रहरी महानिरीक्षक (आईजी) चन्द्रकुवेर खापुङले ‘मिडिया ट्रायल’ भनेका छन् ।

काठमाडौं बाहिर रहेका उनले  टेलिफोन संवाद गर्दै डकुमेन्ट्रीमा प्रस्तुत भएका प्रहरीका संवाद र कलसाइनहरु हुबहु नहुनसक्ने बताए ।

नेपाल प्रहरीको सञ्चार सेटको टावर, डाटा अद्यावधिक र भण्डारण अत्यन्तै संवेदनशील विषय भएको र ती कुरा जोकसैलाई प्रहरीले उपलब्ध नगराउने उनको भनाइ छ । तर, न्यायीक अधिकारसहित सरकारद्वारा गठित जाँचबुझ आयोगलाई प्रहरीले उक्त विवरण उपलब्ध गराएको उनले स्वीकारे । तर, डकुमेन्ट्रीमा आएका कुराहरु प्रहरीले ‘दिएजस्तो नलाग्ने’ उनले बताए ।

खापुङ कात्तिक २७ गते नेपाल प्रहरी सेवाबाट अनिवार्य अवकास भएका थिए । उनको अवकासपछि सरकारले तत्कालीन उपत्यका प्रहरी प्रमुख एआईजी दानबहादुर कार्कीलाई रिक्त आईजी पदमा नियुक्त गरेको हो ।
प्रस्तुत छ, खापुङसँगको संवादका केही अडिायो अंश–

–बीबीसीको डकुमेन्ट्रीबारे के भन्नुहुन्छ ?
–यो ‘मिडिया ट्रायल’ हो । चुनावको मुखमा निकालेका छन् । त्यसैले यो ‘कन्टेन्ट’ (विषयबस्तु)मा भन्दा पनि ‘टपिक’ (शीर्षक)मा खेलिरहेका छन् । ‘कन्टेन्ट’ मा खासै केही छैन ।

– कलसाइनसहित आएका संवाद के हुन् ?
–त्यहाँ आएकै जस्तो हो भन्ने मलाई लाग्दैन । कहाँबाट आयो ? कि पुलिसमा हुन्छ, कि आयोगले दिएको हुनुपर्छ । आयोगले उसको प्रतिवेदनको ‘ट्रायल’ गरेको होला ।

– कर्फ्यु लागिसकेपछि गोली हान्ने आदेश दिनुभएको हो कि होइन ?
–कर्फ्यु आदेश जारी भएपछि ‘आवश्यकता अनुसार गर’ भनेको छ । गोली हान भनेको त छैन नि । पुलिस मर्न आँट्यो, ज्यान जान आँट्यो, आगो लागिसक्यो के गर्ने भनेर कराइराख्दा कफ्र्यु आदेश जारी भएपछिको अवस्थामा कानून बमोजिम गर्ने हो । फिल्डको ‘सिच्युवेशन’ (परिस्थिति)हेरेर आवश्यकताअनुसार गर्ने हो ।

– वाकिटाकी सेटको डिटेल्स कति सत्य हो ?
–त्यो हामीले पठाएको डिटेल्स होइन । कहाँबाट गयो, थाहा छैन ।

–यो काम निर्वाचन बिथोल्न गरिएको हो कि कुनै निश्चित राजनीतिक दलप्रति लक्षित हो ? के लाग्छ तपाईंलाई ?
–जेन–जी, रास्वपाहरुको ‘फेबर’ (पक्ष)मा (निर्वाचन परिणाम) जाओस् भनेर होला । माहोललाई त्यसरी सिर्जना गर्न खोजेको जस्तो लाग्छ ।