अमेरिकामा ख्याति कमाएका भूगोलवीद प्रा.डा. तुलसी जोशीको निधन

धनगढी, १७ माघ ।
अमेरिकामा ख्याति कमाएका सुदूरपश्चिमका भूगोलवीद प्रा.डा. तुलसी जोशीको निधन भएको छ ।

जोशीकी पत्नी मार्लिनले शुक्रवार विहान ८७ वर्षको उमेरमा उनको मृत्यु भएको पुष्टि गरेकी हुन् । वेष्ट भर्जिनियास्थित निवासमा जोशीको निधन भएको हो ।

वि.स. १९९५ मा बझाङको व्यासी गाँउ पञ्चायत (हालः छविस पाथिभेरा गाँउपालिका) को तामाखानीमा भानुभक्त जोशी र महालक्ष्मी जोशीको जेठो सन्तानका रुपमा जन्मिएका जोशी ६४ वर्षअघि (सन १९६२) मा छात्रवृतिमा अमेरिका पढ्न गएका थिए । बझाङी राजा जयपृथ्वी बहादुर सिंहपछि अमेरिका जाने जोशी दोस्रो सुदूरपश्चिमेली थिए ।

सत्यवादीमावि भोपुरमा माध्यमिक तहको पढाई सकेर काठमाण्डौंबाट एसएलसी दिएका जोशी त्रिचन्द्र कलेजमा अध्ययनका क्रममा छात्रवृति पाएर अमेरिका पढ्न गएका थिए ।

अमेरिकामा भूगोलमा विद्यावारिधी गरेका जोशीले पुरै जीवन प्राध्यापनमा विताए । प्राध्यापनसंगै नेपाली विद्यार्थीहरुलाई छात्रवृति दिएर उनले ठूलो गुन लगाएका छन् । त्यसबाहेक सुदूरपश्चिमको शिक्षा क्षेत्रमा समेत जोशीले ठूलो सहयोग गरेका छन् ।

डा. जोशीले झण्डै एक करोड रुपैया दान गरेपछि धननगढी उपमहानगरपालिका—४ उत्तरबेहडीस्थित राष्ट्रिय माध्यामिक विद्यालयको नाम तुलसीराम राष्ट्रिय माध्यामिक विद्यालय राखिएको छ ।

जोशीले बझाङको शान्तिमावि चौघान पाटामा बुवा भानुभक्त जोशीका नाममा र बान्नीचौर उच्चमाविमा आमा महालक्ष्मी जोशीका नाममा १२ १२ लाख रुपैयाको अक्षयकोष स्थापनाका लागि १२/१२ लाख रुपैया दिएका छन् ।

आफ्नो पारिश्रमिकबाट छात्रवृतिमा दुई करोड रुपैया सहयोग गरेका उनले बिभिन्न कलेज तथा युनिभर्सिटिका तर्फबाट नेपाली विद्यार्थीहरुलाई १० करोडभन्दा बढिको छात्रवृति दिलाएका छन् ।

प्रा.डा. जोशीको योगदानको कदर गर्दै अमेरिकाको वेष्ट भर्जिनिया राज्यको फेयरमण्ट राज्य विश्वविद्यालयमा उनको सम्मानमा उनी र उनकी पत्नीको नामबाट अन्तर्राष्ट्रिय विद्यार्थी कार्यालयको नामाकरण गरिएको छ ।

वेष्ट भर्जिनिया राज्यको फेयरमण्ट राज्य विश्वविद्यालयले सोही विश्वविद्यालयमा प्रा.डा. तुलसी जोशी र उनकी श्रीमती मर्लिनको नाममा ‘तुलसी एण्ड मर्लिन जोशी अफिस फर एजुकेशनल पाथवेज फर इन्टरनेशनल सेन्टर्स एण्ड स्टुडेन्टस्’ को नाम दिएको   हो ।

सुदूरपश्चिमको शिक्षा क्षेत्रमा पुर्याएको योगदानको कदर गर्दै उनको धनगढीमा अभिनन्दनसंगै रथ यात्रा गरिएको थियो ।

र, यो पनि ।

अमेरिकामा ख्याती कमाएका सुदूरपश्चिमका भूगोलविद्