सुदूरपश्चिम प्लेअफमा पुग्ने पहिलो टोली
काठमाडौँ — सुदूरपश्चिम रोयल्स नेपाल प्रिमियर लिग ९एनपीएल० क्रिकेटको प्लेअफ पुग्ने पहिलो टोली बनेको छ । सुदूरपश्चिमले शनिबारको दोस्रो खेलमा डिफेन्डिङ च्याम्पियन जनकपुर बोल्ट्सलाई ६ विकेटले पराजित गर्यो ।
इशान पाण्डे र विनोद भण्डारीले संयमीत इनिङ्स खेलेपछि सुदूरपश्चिमले त्रिवि क्रिकेट अन्तर्राष्ट्रिय क्रिकेट मैदान कीर्तिपुरमा १ सय ४६ रनको लक्ष्य १४ बल अगाडि नै पुरा गर्यो ।सुदूरपश्चिम गत वर्ष जनकपुरसँगैं फाइनलमा पराजित भएको थियो । तर यसपटक बलियो उपाधि दावेदारी प्रस्तुत गरेको सुदूरपश्चिमले पहिलो पाँचै खेल जितेर प्लेअफमा स्थान पक्का गर्दै क्वालिफायर्स १ नजिक पुगेको हो । त्यसको विपरीत पहिलो चारै खेल हारेपछि जनकपुर बाहिरिने लगभग निश्चित जस्तै भएको छ ।
इशानले ३५ बल खेली ५६ र विनोदले ४९ बलमा ४२ रन बनाए । इशानले ८ चौका र १ छक्का तथा विनोदले ४९ बल खेली ३ चौका र १ छक्का प्रहार गरे । ओपनर जस ब्राउन खेलको पहिलो बलमै र क्रिस लिन १ रनमै आउट भएको अवस्थामा इशान र विनोदले ७५ बलमा ९१ रनको साझेदारी गरेका थिए ।
कप्तान दीपेन्द्रसिंह ऐरीले ७ बलमा १० र हरमित सिंहले १० बलमा अविजित २५ रन बनाउँदै सुदूरपश्चिमलाई जिताए । हरमितले १ चौका र ३ छक्का प्रहार गरे । जनकपुरका माज सदाकतले २ तथा सञ्जय कृष्णमुर्थी र आदित्य महताले १–१ विकेट लिए ।
यसअघि अमेरिकी ब्याटर कृष्णमुर्थीको अर्धशतकबाट प्रेरित जनकपुरले निर्धारित २० ओभर खेली ८ विकेट गुमाई १ सय ४५ रन बनाएको थियो । अन्तिम ८ ओभरमा ७८ रन जोड्दै जनकपुर यो स्कोरमा उभिन सफल भएको थियो ।
१२ ओभरमा ६७–४ को स्थितिमा रहेको जनकपुरको इनिङ्स तानेका कृष्णमुर्थीले ३८ बलमा ५० रन बनाए । उनले ४ चौका र २ छक्का प्रहार गरे । कृष्णमुर्थीले दीपेन्द्रले फालेको १५ औँ ओभरमा २ छक्का र १ चौकासहित २० रन प्रहार गरेका थिए । कृष्णमुर्थी र आदित्य महताले पाँचौँ विकेटमा ५५ रन जोडे । आदित्यले १३ बलमा २ चौकासहित १५ रन बनाए ।
अविनाश बोहराले १८ औँ ओभरमा कृष्णमुर्थी र शुभ कंसाकारलाई लगातार बलमा आउट गरेर सुदूरपश्चिमलाई खेलमा फर्काएका थिए । अविनाशले सो ओभरमा २ रनमात्र दिएका थिए । पार्नेल १२ बल खेली १४ रनमा आउट भए । रुपेश सिंह १ रनमा अविजित रहे ।
अविनाशले सुदूरपश्चिमबाट ४ विकेट लिए । उनले ४ ओभरमा ३० रन खर्चे । अर्का तीव्र बलर स्कट कुग्लेनले ४ ओभरमा २२ रन खर्चेर ३ र दीपेन्द्रले ३ ओभरमा ३० रन खर्चेर १ विकेट लिए ।
जनकपुरको सुरुआत राम्रो थिएन । कुग्लेनले खेलको पहिलो ओभरमै आसिफ शेखलाई बोल्ड गरे । उनले नै मयन यादवलाई ६ रनमा एलबीडब्लु आउट गरे । ओपनर माज सदाकत ९ बलमा २ चौका प्रहार गरि १२ रनमा दीपेन्द्रबाट बोल्ड भए । यान निकोल लफ्टी इटनले ३३ बलमा ३९ रन बनाए । उनले समान २ चौका र छक्का प्रहार गरे ।
