जम्मु–कश्मीरमा आकस्मिक बाढी, ११ जनाको मृत्यु

एजेन्सी । भारतको जम्मु–कश्मीर क्षेत्रमा अत्यधिक वर्षापछि आएको बाढीले कम्तीमा ११ जनाको ज्यान लिइसकेको छ । पछिल्ला दिनहरूमा परेको भारी वर्षाले रामबन र रियासी जिल्लामा बाढीको स्थिति सिर्जना गरेको हो, जसमा ५ वर्षका एक बालक अझै बेपत्ता छन् । स्थानीय आपतकालीन अधिकारीका अनुसार शुक्रबार राति बाढी र पहिरोले ती क्षेत्रमा ठूलो क्षति पुर्‍याएको छ ।

भारतको मौसम विभागका अनुसार जम्मु र उधमपुरमा २४ घण्टामा २९६ मिलिमिटर र ६२९ मिलिमिटर वर्षा भएको छ, जुन विगतका रेकर्डभन्दा धेरै बढी हो ।

बाढी र पहिरोजस्ताघटनाहरू सामान्यतः जुनदेखि सेप्टेम्बरसम्मको वर्षा याममा हुन्छन्, तर विशेषज्ञहरूले जलवायु परिवर्तन र अत्यधिक निर्माण कार्यका कारण यस किसिमका घटनाहरूको जोखिम बढेको चेतावनी दिएका छन् । हिमालय क्षेत्रमा केन्द्रित अन्तर्राष्ट्रिय पर्वतीय विकास केन्द्रका जलवायु विशेषज्ञहरूका अनुसार, अत्यधिक वर्षा र हिमालयका ढल्किएका पहाडहरूमा निर्माण कार्यले बाढीको जोखिमलाई थप बढाएको छ ।

अघिल्लो महिना, १४ अगस्तमा चिसोटी गाउँमा बाढीका कारण कम्तीमा ६५ जनाको ज्यान गएको थियो भने ३३ जना अझै बेपत्ता छन् । ५ अगस्तमा उत्तराखण्ड राज्यको धाराली नगरमा पनि बाढी र पहिरोले ठूलो क्षति पुर्‍याएको थियो, जसका कारण ७० जनाभन्दा बढीको मृत्यु भएको अनुमान गरिएको छ ।