बिमा प्राधिकरणको अध्यक्ष नियुक्तिका लागि अर्थले माग्यो आवेदन

काठमाडौं । सरकारले बिमा कम्पनीहरूको नियामक निकाय नेपाल बिमा प्राधिकरणको अध्यक्ष नियुक्तिको प्रक्रिया अघि बढाएको छ ।  यही भदौ २ गते बसेको मन्त्रिपरिषद् बैठकले सरद ओझालाई पदमुक्त गरेपछि अर्थ मन्त्रालयले शनिबार प्राधिकरणको नयाँ अध्यक्ष नियुक्तिको प्रक्रिया अघि बढाएको हो ।

ओझाको योग्यताबारे छानबिन गर्न सरकारले उच्च अदालतका पूर्वन्यायाधीश कृष्ण गिरीको संयोजकत्वमा छानबिन समिति गठन गरेको थियो । समितिले अयोग्य ठहर गरेपछि मन्त्रिपरिषद्ले ओझालाई अध्यक्षबाट बर्खास्त गरेको थियो ।  सरकारले गत फागुन १२ गते ओझालाई बिमा प्राधिकरणको अध्यक्षमा नियुक्त गरेको थियो । अध्यक्षका लागि सात दिनभित्र अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखामा गोप्य खामबन्दी आवेदन दिनुपर्नेछ ।

प्राधिकरणको अध्यक्ष हुन बिमा, मौद्रिक, वाणिज्यशास्त्र व्यवस्थापन जनप्रशासन तथ्यांकशास्त्र, गणित, अर्थशास्व वा कानुन विषयमा कम्तिमा स्नातकोत्तर वा सो सरहको उपाधि हासिल गरी सम्बन्धित क्षेत्रमा कम्तिमा पाँच वर्षको उनुभव व्यवस्थापकीय कार्य अनुभव हासिल गरेको हुनुपर्नेछ । उच्च नैतिक चरित्र भएको व्यक्ति योग्य हुने मन्त्रालयले जनाएको छ ।  अर्थ मन्त्रालय सम्बद्ध सार्वजनिक निकायका पदाधिकारी तथा व्यक्तिको नियुक्ति र मनोनयन सम्बन्धी मापदण्डअनुसार ३० वर्ष उमेर पूरा भई ६५ वर्ष ननाघेको हुनुपर्ने मन्त्रालयले जनाएको छ ।