डाना कप २०२५ को उपाधि नेपाली टोलीले जित्यो

काठमाडौं । डेनमार्कमा सम्पन्न डाना कप २०२५ को उपाधि जित्दै नेपाली यू-१४ टोलीले ऐतिहासिक सफलता हात पारेको छ।

गोल्स एकेडेमी, एजी टेन फुटबल एकेडेमी र एकेडेमी नेपाल संयुक्त रूपमा बनेको टोलीले शुक्रबार भएको फाइनलमा केन्यालाई ३–१ ले पराजित गर्दै उपाधि जितेको हो ।

फाइनल खेलमा रिहान बुद्ध मगर, नोआ राय र अरणिस गुप्ताले गोल गर्दै टोलीलाई जित दिलाए।

यसअघि सेमिफाइनलमा नेपाली टोलीले यूएईको आईएफए स्पोर्टलाई ३–० गोलले हराउँदै पहिलोपटक फाइनलमा स्थान बनाएको थियो।

यो उपलब्धिसँगै नेपाली यू-१४ टोलीले अन्तर्राष्ट्रिय स्तरमा ऐतिहासिक सफलता हासिल गरेको छ।