इजरायल ६० दिनको युद्धविराममा सहमत भएको डोनाल्ड ट्रम्पको घोषणा

काठमाडौं । अमेरिकी राष्ट्रपति डोनाल्ड ट्रम्पले इजरायलले गाजामा ६० दिने युद्धविरामलाई अन्तिम रूप दिन आवश्यक सर्तहरूमा सहमति जनाएको बताएका छन्।
“हामी युद्ध अन्त्य गर्न सबै पक्षहरूसँग मिलेर काम गर्नेछौं,” ट्रम्पले ट्रुथ सोसलमा लेखेको पोस्टमा लेखे , यद्यपि उनले सर्तहरूको बारेमा कुनै विवरण दिएनन्।

ट्रम्पले लेखे, “कतार र इजिप्टले शान्ति स्थापना गर्न कडा परिश्रम गरेका छन् र उनीहरूले यो अन्तिम प्रस्ताव प्रस्तुत गर्नेछन्। मलाई आशा छ कि हमासले यो सम्झौता स्वीकार गर्नेछ किनकि योभन्दा राम्रो परिस्थिति अर्को हुने छैन बरु झनै खराब हुनेछ।”

अक्टोबर ७, २०२३ मा हमासले इजरायलमा आक्रमण गर्‍यो। यसमा लगभग १,२०० जना मारिए। यसपछि इजरायलले गाजामा सैन्य कारबाही सुरु गर्‍यो।

हमासको स्वास्थ्य मन्त्रालयका अनुसार त्यसबेलादेखि गाजामा कम्तिमा ५६,६४७ जनाको मृत्यु भइसकेको छ। यद्यपि, हमासले यी सर्तहरू स्वीकार गर्नेछ कि गर्दैन भन्ने कुरा अझै स्पष्ट छैन।

ट्रम्पको यो घोषणा अर्को हप्ता इजरायली प्रधानमन्त्री बेन्जामिन नेतान्याहूसँगको भेटअघि आएको हो, जसको बारेमा ट्रम्पले आफू धेरै दृढ रहने बताएका छन्।

अमेरिकी राष्ट्रपतिले मंगलबार भने कि उनी विश्वास गर्छन् कि नेतान्याहू पनि गाजामा शत्रुता अन्त्य गर्न चाहन्छन्। ट्रम्पले यो पनि भने, “मलाई लाग्छ हामी अर्को हप्ता सम्झौता गर्नेछौं।”

गत हप्ता हमासका एक वरिष्ठ अधिकारीले बीबीसीलाई बताएअनुसार मध्यस्थकर्ताहरूले गाजामा नयाँ युद्धविराम गर्न र बन्धकहरूलाई रिहा गर्न प्रयासहरू तीव्र पारेका थिए, तर इजरायलसँगको वार्ता अझै पनि अवरुद्ध नै छ।

इजरायलले हमासलाई पूर्ण रूपमा नष्ट गरेमा मात्र द्वन्द्व अन्त्य हुन सक्ने बताएको छ। हमासले लामो समयदेखि स्थायी युद्धविराम र गाजाबाट पूर्ण इजरायली फिर्ताको माग गर्दै आएको छ।

गाजामा अझै पनि लगभग ५० इजरायलीहरू बन्धक बनाइएका छन्, जसमध्ये कम्तिमा २० जना जीवित रहेको सम्भावना छ।