स्पेनसँग पोर्चुगल १-० ले पराजित हुँदा रोनाल्डोको विश्वकप यात्रामा पूर्णविराम

फिफा विश्वकपको राउन्ड अफ-१६ अन्तर्गत भएको रोमाञ्चक प्रतिस्पर्धामा स्पेनले पोर्चुगललाई १-० ले पराजित गर्दै क्वाटरफाइनलमा स्थान सुरक्षित गरेको छ।

अमेरिकाको डलास रंगशालामा भएको खेलमा निर्धारित ९० मिनेटसम्म दुवै टोलीले गोल गर्न नसकेपछि खेल अतिरिक्त समयतर्फ धकेलिएको थियो। तर, खेलको दोस्रो हाफको अतिरिक्त समयमा मिकेल मेरिनोले निर्णायक गोल गर्दै स्पेनलाई जित दिलाए।

यो जितसँगै स्पेन १६ वर्षपछि विश्वकपको क्वाटरफाइनलमा प्रवेश गरेको छ। यसअघि सन् २०१० मा च्याम्पियन बनेपछि स्पेनले क्वाटरफाइनलको यात्रा तय गर्न सकेको थिएन। अर्कोतर्फ, यस हारसँगै पोर्चुगलको विश्वकप यात्रा राउन्ड अफ-१६ मै समाप्त भएको छ।

४१ वर्षीय सुपरस्टार क्रिस्टियानो रोनाल्डोका लागि यो छैटौं तथा अन्तिम विश्वकप थियो। खेलपछि मैदानबाट बाहिर निस्कँदा उनी निकै भावुक देखिएका थिए। खेलको पूर्वसन्ध्यामा पत्रकारहरूसँग कुरा गर्दै उनले भनेका थिए, ‘मेरो अन्तिम विश्वकपको पूर्ण आनन्द लिन चाहन्छु।’ यस खेलसँगै फुटबलको सबैभन्दा ठूलो मञ्चमा रोनाल्डोको यात्रा टुंगिएको छ। उनले विश्वकपमा कुल ११ गोल गरेका छन्।

खेलको अतिरिक्त समयमा फेरान टोरेसको थ्रु बलमा मेरिनोले गोलकिपर डियोगो कोस्टालाई बिट गर्दै गोल गरेका थिए। स्पेनका प्रशिक्षक लुइस डे ला फुएन्टेले मेरिनोको प्रशंसा गर्दै भने, ‘मिकेल मेरिनोले कहिल्यै निराश पार्दैनन्। उनी पक्का छन्। उनले हामीलाई युरो जिताएका छन्। उनी एक विशाल खेलाडी हुन्।’

पोर्चुगलका प्रशिक्षक रोबर्टो मार्टिनेजले टोलीको प्रदर्शनप्रति गर्व महसुस भएको बताए। मार्टिनेजले भने, ‘हामीले धेरै गर्व गर्न सक्छौँ। खेलाडीहरूले आफ्नो हृदय र आत्मा दिएका छन्। हामीले बलियो टोलीको सामना गर्यौँ र आफ्नो अडान कायम राख्यौँ।’

यस विश्वकपमा स्पेनको यो लगातार छैटौँ ‘क्लिन सिट’ हो, जुन प्रतियोगिताको रेकर्ड हो। गोलकिपर उनाई सिमोनले आफ्नो गोलरहित समयलाई ६०९ मिनेटसम्म पुर्‍याएका छन्। स्पेनले अब क्वाटरफाइनलमा बेल्जियम र अमेरिकाबिचको विजेतासँग प्रतिस्पर्धा गर्नेछ। यी दुईबिच अहिले ५:४५ बजेदेखि खेल हुँदैछ।