तोडफोड, हिंसा, आगजनी र लुटपाटजस्ता गतिविधिलाई वैधानिकता दिने काम भयो : ओली
काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले देशमा तोडफोड, हिंसा, आगजनी र लुटपाटजस्ता गतिविधिलाई वैधानिकता दिने काम भएको बताएका छन् ।
मंगलबार काठमाडौंमा आयोजित एक कार्यक्रममा बोल्दै उनले देश बर्बाद भएको र त्यसै कारण खेलकुद लगायतका कुनै पनि क्षेत्र गतिका साथ अघि बढ्न नसकेको तर्क गरे ।
ओलीले आफूले अनेक क्षेत्रबाट मुलुकलाई अघि बढाउने प्रयत्न गरेको भए पनि वर्तमान सरकारले देशलाई बर्बादीको बाटोमा अघि बढाएको आरोप लगाए । उनले आमजनताले न्याय पाउने गरी आफूहरूले देशलाई फेरि अघि बढाउने दाबी गरे ।
“हामीले देशलाई अगाडि बढाउन खोज्यौँ । भुइँचालोले ध्वस्त बनायो, हामीले त्यसलाई उठायौँ । कोभिडले ध्वस्त पार्न खोज्यो, त्यसलाई हामीले उठायौँ । अर्थतन्त्र ध्वस्त अवस्थाबाट हामीले माथि उठायौँ । तर, त्यो कुरा सैह्य भएन,” ओलीले भने, “विभिन्न शक्तिहरूले त्यसलाई संवैधानिक हिसाबले ढाल्न नसकेपछि असंवैधानिक हिसाबले, उपद्रवको हिसाबले तोडफोड, हिंसा, आगजनी, लुटपाट जस्ता कुराहरूबाट सरकार ढाल्ने बाटो समातियो । त्यसलाई वैधानिकता दिने काम भएको छ ।”
अध्यक्ष ओलीले हरेक नागरिकमा देशभक्तिको भावना आवश्यक रहेको बताए । न्युज एजेन्सी नेपाल
ट्रेन्डिङ
सम्बन्धित
