विपद् पूर्वतयारी बलियो बनाउन ‘टेबलटप’ अभ्यास

कैलाली ।  सुदूरपश्चिममा हुनसक्ने सम्भावित विपद्लाई मध्यनजर गर्दै धनगढीमा ‘टेबलटप’ अभ्यास गरिएको छ। आन्तरिक मामिला तथा कानुन मन्त्रालयको आयोजनामा भएको कार्यक्रममा सहभागीहरूले विपद्को काल्पनिक परिदृश्यमा आधारित भई कसरी उद्धार र राहतका काम गर्ने भन्नेबारे व्यावहारिक अभ्यास गरेका हुन ।

अभ्यासका क्रममा सहभागीहरूले कुनै ठूलो विपद् आइलागेमा कसरी आपतकालीन सञ्चार गर्ने, खोज तथा उद्धारमा कसरी जुट्ने, घाइतेको उपचार र राहत वितरणलाई कसरी प्रभावकारी बनाउने भन्ने विषयमा गहन छलफल गरेका थिए। साथै, अस्थायी आश्रयस्थलको व्यवस्थापन र अन्तर-निकाय समन्वय कसरी गर्ने भन्नेबारे पनि अभ्यास गरिएको थियो।

कार्यक्रममा बोल्दै मन्त्रालयका सचिव तेज प्रकाश जोशीले वास्तविक विपद्का बेला देखिन सक्ने चुनौतीहरूको पूर्वानुमान गर्न र विभिन्न निकायबीच आपसी तालमेल मिलाउन यस्ता अभ्यासले महत्त्वपूर्ण भूमिका खेल्ने बताए। यो अभ्यासबाट प्राप्त भएका सिकाइ र सुझावहरूले आगामी दिनमा सुदूरपश्चिम प्रदेशको विपद् पूर्वतयारी तथा प्रतिकार्य योजनालाई अझै व्यावहारिक र प्रभावकारी बनाउन मद्दत पुग्ने उनको विश्वास छ ।

सहभागीहरूले पनि यस्ता कार्यक्रमले विपद्का बेला तत्काल सही निर्णय लिन सक्ने क्षमता बढाउने धारणा राखेका थिए। युरोपेली आयोगको आर्थिक सहयोग तथा युएनडिपी नेपाल, युनिसेफ नेपाल, युएन वुमन र हेन्डिक्याप इन्टरनेसनलको प्राविधिक सहयोगमा रुडुक नेपालमार्फत सुपर-२ परियोजना अन्तर्गत यो कार्यक्रम सञ्चालन गरिएको हो।

मन्त्रालयका सचिव तेज प्रकाश जोशीको अध्यक्षतामा भएको छलफलमा सरकारी तथा गैरसरकारी निकाय, सुरक्षा निकाय, संयुक्त राष्ट्रसंघका विभिन्न अंगहरू, नेपाल रेडक्रस सोसाइटी, निजी क्षेत्र र सञ्चारकर्मीहरूको  उपस्थिति थियो।