बैतडीमा बस दुर्घटनामा एक जनाको मृत्यु, १० जना घाइते

बैतडी । बैतडीको दशरथचन्द राजमार्ग अन्तर्गत साईलक खण्डमा बुधबार साँझ एउटा यात्रुवाहक बस दुर्घटना हुँदा एक जनाको मृत्यु भएको छ भने १० जना घाइते भएका छन् ।

जिल्ला प्रहरी कार्यालय बैतडीका अनुसार, धनगढीबाट बैतडीतर्फ आउँदै गरेको सुदूरपश्चिम यातायातको सुदूरपश्चिम प्रदेश ०१–००१ ख ३६४६ नम्बरको बस बुधबार साँझ करिब ५ बजेर ४० मिनेटमा दशरथचन्द नगरपालिका–४, साईलकमा अनियन्त्रित भई सडकबाट करिब २५–३० मिटर तल खसेको हो ।

दुर्घटनामा परेर दशरथचन्द नगरपालिका–६ बस्ने ३५ वर्षीय वीरेन्द्र बहादुर चन्दको मृत्यु भएको छ ।

दुर्घटना लगत्तै जिल्ला प्रहरी कार्यालय बैतडीबाट प्रहरी नायब उपरीक्षक दीपक कुमार रायको नेतृत्वमा २५ जनाको टोली घटनास्थल पुगेर उद्धार कार्य गरेको थियो ।

बसमा चालकसहित जम्मा १२ जना सवार थिए । घाइते १० जनालाई उपचारका लागि जिल्ला अस्पताल बैतडी पठाइएको छ । घाइतेमध्ये धेरैको अवस्था सामान्य रहे पनि एक जनाको अवस्था मध्यम रहेको बताइएको छ ।

घाइते हुनेहरूको विवरण

• लक्ष्मी ऐरी २७ वर्ष – सामान्य चोट
• हेम विक्रम जोशी ९८ वर्ष – सामान्य चोट
• पूर्ण देवी जोशी ६० वर्ष– सामान्य चोट
• पुजा कार्की २१ वर्ष– हातमा चोट (सामान्य)
• ललिता लावड २० वर्ष– सामान्य चोट
• विजय सिंह थापा वर्ष नखुलेको
• जानकी लावड ३२ वर्ष – टाउकोमा चोट सामान्य
• लक्ष्मी साउद ३० वर्ष– टाउकोमा चोट सामान्य
• कर्ण देव भट्ट ५२ वर्ष० – सामान्य चोट
• कविराज भट्ट ३५ वर्ष – शरीरमा चोट मध्यम

बस चालक बैतडीकै पाटन नगरपालिका–८ बस्ने ३७ वर्षीय केशव सिंह महरालाई प्रहरीले नियन्त्रणमा लिएको छ । उनी सकुशल रहेको प्रहरीले जनाएको छ ।