वैदेशिक रोजगारीका क्रममा दैनिक चारजनाभन्दा बढीको मृत्यु !

काठमाडौं । चालु आर्थिक वर्ष २०८२/८३ को पहिलो ११ महिनामा वैदेशिक रोजगारीका क्रममा एक हजार ४३८ नेपालीको मृत्यु भएको छ ।

२०८२ साउन १ गतेदेखि २०८३ जेठ मसान्तसम्मको अवधिमा उनीहरूको मृत्यु भएको वैदेशिक रोजगार बोर्डले सार्वजनिक गरेको विवरणमा उल्लेख छ ।

बोर्डका अनुसार, गत जेठ महिनामा मात्र वैदेशिक रोजगारीको सिलसिलामा विभिन्न देशमा १४४ नेपालीको मृत्यु भएको छ ।

चालु आर्थिक वर्ष सुरु भएयता वैदेशिक रोजगारीका क्रममा प्रत्येक महिना औसतमा १३० जनाभन्दा बढी र प्रत्येक दिन चारजनाभन्दा बढी नेपालीको मृत्यु भएको बोर्डको तथ्यांकले देखाउँछ ।

बोडको विवरणअनुसार पछिल्लो १० वर्ष ११ महिनामा वैदेशिक रोजगारीका सिलसिलामा १२ हजार १३२ नेपालीको मृत्यु भएको छ ।

वैदेशिक रोजगारीका क्रममा आर्थिक वर्ष २०७२/७३ मा ८१६ जना, २०७३/७४ मा ७५६ जना, २०७४/७५ मा ८२१ जना, २०७५/७६ मा ७५४ जना र २०७६/७७ मा ६६१ जना नेपालीले ज्यान गुमाएका थिए ।

यस्तै, आर्थिक वर्ष २०७७/७८ मा एक हजार २४२ जना, २०७८/७९ मा एक हजार ३९५ जना, २०७९/८० मा एक हजार २०८ जना, २०८०/८१ मा एक हजार ४५८ जना, २०८१/८२ मा एक हजार ५८३ जनाले ज्यान गुमाएका छन् ।

चालु आर्थिक वर्ष २०८२/८३ का पहिलो ११ महिनामा एक हजार ४३८ जना नेपालीको मृत्यु वैदेशिक रोजगारीको सिलसिलामा भएको बोर्डको तथ्यांकले देखाउँछ ।