‘नेपालले भारतको जग्गा मिचेको’ अभिव्यक्तिविरुद्ध सडकमा उत्रियो श्रम संस्कृति पार्टी

काठमाडौं । सीमासम्बन्धी प्रधानमन्त्री बालेन्द्र शाह (बालेन)को अभिव्यक्तिविरुद्ध श्रम संस्कृति पार्टीले शनिबार (जेठ २३) विरोध प्रदर्शन गरेको छ । ‘नेपालले भारतको जग्गा मिचेको’ भन्ने प्रधानमन्त्रीको अभिव्यक्ति राष्ट्रिय हितविपरीत रहेको भन्दै श्रम संस्कृति पार्टीका नेता–कार्यकर्ताले काठमाडौंको माइतीघरमा खबरदारी सभासहित प्रदर्शन गरेका हुन् ।

प्रदर्शनमा सहभागीले संसद्मा प्रधानमन्त्रीले दिएको अभिव्यक्ति तथ्यहीन रहेकाले फिर्ता गर्नुपर्ने माग गरे । साथै, उनीहरूले ‘नेपाली माटोको रक्षा गरौँ’, ‘राष्ट्रको सम्मान जोगाऔँ’, ‘गैरजिम्मेवारी अभिव्यक्तिको विरोध गरौँ’ लगायत नारा लेखिएका प्लेकार्ड प्रदर्शन गरेका थिए ।

उक्तक्रममा श्रम संस्कृति पार्टीका सांसद आरेन राईले सीमाका विषयमा प्रधानमन्त्रीले सदनमा गैरजिम्मेवार अभिव्यक्ति दिएको बताए । उनले सीमा समस्या र भूमि मिच्ने विषय फरक भएको उल्लेख गरे ।

उनले सदनमा आफूहरूले राख्दै आएको अडान कायमै रहने समेत बताए । हिमालयन टेली भ्वाइस