आवश्यक परे प्रधानमन्त्रीले पुनः जवाफ दिनुहुनेछ : शिक्षामन्त्री पोखरेल

काठमाडौं । सरकारका प्रवक्ता एवं शिक्षा तथा खेलकुदमन्त्री सस्मित पोखरेलले प्रधानमन्त्री वालेन्द्र शाह (बालेन) संसद्प्रति उत्तरदायी रहेका स्पष्ट पारेका छन् । मंगलबार (जेठ १९) बसेको मन्त्रिपरिषद् बैठकपछि सञ्चारकर्मीका जिज्ञासाको जवाफ दिँदै उनले यस्तो बताएका हुन् ।

आइतबार (जेठ १७) मात्र प्रधानमन्त्रीले सदनमा सांसदहरूले उठाएका जिज्ञासाको जवाफ दिएका उनले उल्लेख गरे । आवश्यकता परे प्रधानमन्त्री पुनः सदनमा उपस्थित भएर जवाफ दिने उनले प्रतिबद्धता जनाए ।

“हामीले देखेकै छौँ, प्रधानमन्त्रीज्यू सदनप्रति उत्तरदायी हुनुहुन्छ । उहाँले केही दिनअघि सदनमा उपस्थित भएर जवाफ दिनुभएको थियो र आवश्यकता परेमा फेरि पनि सदनमा उपस्थित भएर जवाफ दिनुहुनेछ,” उनले भने ।

सीमा विवाद दुई देशबीचको संवाद र ‘टेबल टक’मार्फत समाधान गरिनुपर्ने विषय भएको उनले बताए ।

“सीमा विवादको विषय दुई देशबीचको संवाद र टेबल टकमार्फत समाधान गर्नुपर्ने विषय हो । नेपाल र भारत दुवै पक्षले यस विषयलाई आपसी संवादबाट समाधान गर्ने प्रतिवद्धता व्यक्त गरिसकेका छन्,” उनले भने, “त्यसैले आवश्यक सबै काम–कारबाही कूटनीतिक माध्यमबाट परराष्ट्र मन्त्रालयले अगाडि बढाइरहेको छ ।” न्युज एजेन्सी नेपाल