सुदूरपश्चिममा रास्वपाले हारेका ६ क्षेत्रमा यी सांसदहरूलाई दियो जिम्मेवारी

धनगढी- राष्ट्रिय स्वतन्त्र पार्टीले सुदूरपश्चिम प्रदेशमा पार्टीको साङ्गठनिक सुदृढीकरणका लागि नयाँ कार्यविभाजन गरेको छ। गत फागुन २१ गते भएको प्रतिनिधि सभाको निर्वाचनमा पराजय भोगेका ६ वटा निर्वाचन क्षेत्रहरूमा पार्टीले आफ्ना समानुपातिक सांसदहरूलाई जिम्मेवारी तोकेको हो।

पार्टीको पछिल्लो निर्णयअनुसार ती क्षेत्रहरूमा संगठन विस्तार र जनसम्पर्क बढाउन सांसदहरूलाई प्रत्यक्ष रूपमा खटाइएको छ। जसअनुसार दार्चुला निर्वाचन क्षेत्रको जिम्मेवारी सांसद करिश्मा कठरियालाई दिइएको छ भने बझाङमा सांसद अंकिता ठाकुरलाई जिम्मेवारी दिएको हो।

त्यसैगरी, बाजुरा जिल्लामा सांसद सुनिताकुमारी चौधरी र डोटीमा सांसद पुरुषोत्तम शुभप्रभात यादवलाई जिम्मेवारी प्रदान गरिएको छ। अछामका दुईवटै निर्वाचन क्षेत्रमा पनि रास्वपाले सांसदहरूलाई नै परिचालन गरेको छ। अछाम निर्वाचन क्षेत्र नं. १ मा सांसद टीका संग्रौला र निर्वाचन क्षेत्र नं. २ मा सांसद रत्नाकुमारी थापालाई जिम्मेवारी तोकिएको छ।

गत निर्वाचनमा यी क्षेत्रहरूमा रास्वपाले हार व्यहोरेको थियो।