समिति सभापतिलाई सभामुखको आग्रह– दलीय आस्था नदेखाउनू

काठमाडौं । संसदीय समितिका सभापतिहरूले सभामुख डोलप्रसाद (डीपी) अर्यालसँग भेट गरेका छन् । प्रतिनिधिसभाका १० र संयुक्त दुई गरी १२ समितिका सभापतिले सोमबार (वैशाख ७) सभामुखसँग भेटवार्ता गरेका हुन् ।

सिंहदरबारमा भएको भेटमा सभामुख अर्यालले ‘मिनि संसद्’का रूपमा रहने संसदीय समितिलाई प्रभावकारी रूपमा अघि बढाउन सभापतिहरूलाई निर्देशन दिए । दलीय प्रतिनिधित्व गरेर निर्वाचित भएता पनि समितिका काम–कारबाहीमा राजनीतिक दलको आस्था र प्रभाव नदेखाउन उनले आग्रह गरे ।

उनले संघीय संसद् सचिवालय र आफू सधैँ सहयोगका निम्ति तत्पर रहेको पनि बताए ।

समिति सभापतिहरूले आफूहरूले प्राप्त गरेको जिम्मेवारी कुशलतापूर्वक निर्वाह गर्ने प्रतिबद्धता जनाए ।

पुराना असल अभ्यासलाई निरन्तरता दिँदै संसदीय मूल्य–मान्यता आत्मसात् गरी नवीन ढंगबाट समितिका गतिविधि अगाडि बढाइने उनीहरूले बताएका सभामुख अर्यालको सचिवालयले जनाएको छ ।