भारतीय समकक्षीको निमन्त्रणामा परराष्ट्रमन्त्री खनाल मौरिसस जाँदै

काठ्माण्डौ- परराष्ट्रमन्त्री शिशिर खनाल नवौँ हिन्द महासागर सम्मेलनलाई सम्बोधन गर्न आज मौरिससको पोर्ट लुइस प्रस्थान गर्दै छन्। परराष्ट्र मन्त्रालयका अनुसार भारतीय विदेशमन्त्री डा. एस. जयशंकरको निमन्त्रणामा उनी त्यसतर्फ जान लागेका हुन्।

१० अप्रिल (शुक्रबार) देखि १२ अप्रिल (आइतबार) सम्म चल्ने यस सम्मेलनलाई इन्डिया फाउन्डेसनले मौरिसस सरकारसँगको सहकार्यमा आयोजना गरेको हो। यस वर्षको मुख्य नारा ‘कलेक्टिभ स्टेवार्डसिप फर इन्डियन ओसन गभर्नेन्स’ रहेको छ।

सम्मेलनका क्रममा परराष्ट्रमन्त्रीले हिन्द महासागरको शासन, हिमाल र समुद्रको पारिस्थितिक सम्बन्ध तथा आर्थिक विकासका लागि समुद्री सम्पर्कको महत्त्वबारे नेपालको दृष्टिकोण प्रस्तुत गर्नेछन्। उनले सम्मेलनका क्रममा विभिन्न देशका आफ्ना समकक्षीहरूसँग द्विपक्षीय भेटघाट गर्ने कार्यक्रम समेत रहेको छ।

मन्त्री खनाल १३ अप्रिल (सोमबार) स्वदेश फर्कने परराष्ट्र मन्त्रालयले जनाएको छ।