कञ्चनपुर कारागारमा कैदीबन्दी बीच झडप हुँदा ५ जना घाइते

कञ्चनपुर- कञ्चनपुर कारागारमा कैदीबन्दीबीच झडप हुँदा ५ जना घाइते भएका छन्। बुधबार कारागारमा रहेका ३७२ जना कैदीबन्दीमध्ये केहीबीच आपसमा झडप हुँदा ५ जना घाइते भएको जिल्ला प्रहरी कार्यालय कञ्चनपुरले जनाएको छ।

प्रहरीका अनुसार घटनामा घाइते भएका कैदीबन्दीहरूलाई महाकाली प्रादेशिक अस्पताल महेन्द्रनगर उपचार गरिएको छ। घाइते हुनेमा शुक्लाफाँटा नगरपालिका–७ का २३ वर्षीय ओमप्रकाश घरेडी, शुक्लाफाँटा नगरपालिका–११ का १९ वर्षीय भुवन नाथ, २६ वर्षीय भुवन ऐर र भीमदत्त नगरपालिका–७ का आयुष बम, बेलौरी नगरपालिका–८ का राजु दमाई घाइते रहेका छन्। घाइतेहरूको टाउकोमा सामान्य चोट लागेको र अवस्था सामान्य रहेको प्रहरीले जनाएको छ।