२०८३/८४ को बजेटका लागि राष्ट्र बैंकद्वारा सुदूरपश्चिमबाट सुझाव संकलन

यशोदा शर्मा

कैलाली। नेपाल राष्ट्र बैंकको आर्थिक अनुसन्धान विभागअन्तर्गत रहेको प्रदेश कार्यालय धनगढीले आगामी आर्थिक वर्ष २०८३/८४ को बजेट तर्जुमाका लागि सुदूरपश्चिम प्रदेशबाट सुझाव संकलन गरेको छ।

मंगलबार आयोजित पूर्व–बजेटकालीन अन्तरक्रिया कार्यक्रममा प्रदेशको समग्र आर्थिक अवस्था, समस्या तथा सुधारका आवश्यक उपायबारे सरोकारवाला निकायसँग छलफल गरिएको हो।

राष्ट्र बैंक सरकारको प्रमुख आर्थिक सल्लाहकार निकाय भएकाले यसरी संकलित सुझाव तथा तथ्यांक अर्थ मन्त्रालयमार्फत बजेट निर्माण तथा तर्जुमा प्रक्रियामा समेटिने कार्यालयले जनाएको छ।

कार्यक्रममा विभिन्न सरकारी कार्यालय, बैंक तथा वित्तीय संस्था, उद्योग व्यवसायी तथा सरोकारवाला सहभागि थिए । सहभागीहरूले अन्य प्रदेशको तुलनामा सुदूरपश्चिमको आर्थिक अवस्था कमजोर रहेको उल्लेख गर्दै सुधारका लागि प्रभावकारी नीति, योजना र तिनको पूर्ण कार्यान्वयन आवश्यक रहेको जोड दिए।

उनीहरूले डिजिटल बैंकिङ प्रणालीको विस्तार, व्यवसायीका लागि वित्तीय साक्षरता कार्यक्रम, जलविद्युत् आयोजना कार्यान्वयन, सडक तथा पूर्वाधार स्तरोन्नति, रैथाने कृषि बाली प्रवर्द्धन तथा किसानलाई उचित मूल्य र अनुदानको व्यवस्था गर्न सुझाव दिएका छन्।

यसैगरी पहाडी जिल्लामा उत्पादित वस्तुको बजार पहुँच विस्तारका लागि सडक सञ्जाल तथा ढुवानी व्यवस्थामा सुधार गर्नुपर्नेमा पनि जोड दिइएको थियो।

कार्यक्रममा राष्ट्र बैंक धनगढीका प्रमुख केशब बहादुर केशीले बैंकहरु निश्चित नीति नियममा चल्ने हुँदा कुनै पनि ठगिको खतरा नहुने भएकाले निर्धक्क भएर सेवा लिन आग्रह गरेका छन् । साथै कुनै पनि समस्या भए राष्ट्र बैंकमा सम्पर्क गर्न र सेवाग्राहीका समस्या समाधान गर्न आफु तयार रहेको बताए ।