विश्व बचत सप्ताह, बाजुरामा विद्यार्थीसँग वित्तीय साक्षरता कार्यक्रम
बाजुरा- विश्वव्यापी रुपमा मनाइने ग्लोबल मनी विक २०२६ को अवसरमा मातृभूमि लघुवित्त वित्तीय संस्था लिमिटेडले बाजुराको कोल्टीमा वित्तीय साक्षरता सम्बन्धी जनचेतनामूलक कार्यक्रम आयोजना गरेको छ। यो सप्ताह प्रत्येक वर्ष बालबालिका र युवामा आर्थिक शिक्षा प्रवर्द्धन गर्ने उद्देश्यले मनाइन्छ।
मार्तडी अनुगमन अन्तर्गत रहेको कोल्टी शाखाको आयोजनामा स्वामिकात्तिक माध्यमिक विद्यालयमा सम्पन्न कार्यक्रममा ८१ जना विद्यार्थीहरूको सहभागिता रहेको थियो।
कार्यक्रमको अध्यक्षता मातृभूमि लघुवित्तका अनुगमन प्रमुख नरबहादुर साउंदले गरेका थिए भने वडा नं। ४ का अध्यक्ष सिंहबहादुर धामी प्रमुख अतिथिका रूपमा उपस्थित थिए। विद्यालय व्यवस्थापन समितिका अध्यक्ष नृपराज गिरि, प्रधानाध्यापक रामशिष ठाकुर, शिक्षक बलरुप कठायत लगायतको उपस्थिति रहेको थियो।
शाखाका शाखा प्रबन्धक तारादेवी शाही, कर्मचारीहरू रिता बम, शर्मिला बुढा, सिर्जना शाही, प्रदीप बुढा तथा कवाडी शाखाका शाखा प्रबन्धक राज्य शाही समेत सहभागी थिए।
विद्यार्थीहरूमा बचत गर्ने बानीको विकास गराउने र आर्थिक साक्षरतासम्बन्धी आधारभूत ज्ञान प्रदान गर्ने उद्देश्यका साथ कार्यक्रम आयोजना गरिएको हो । विद्यार्थीहरूलाई सानो बचतको महत्व, बैंकिङ सेवा, आय–व्यय व्यवस्थापन तथा आर्थिक अनुशासनका समेत बारेमा जानकारी प्रदान गरिएको थियो।
यस अवसरमा वाइल शाखाका प्रमुख दीपकबहादुर शाहीले “सानो बचतले ठूलो भविष्य निर्माण गर्न सक्छ” भन्दै विद्यार्थीहरूलाई प्रारम्भिक उमेरदेखि नै बचत गर्ने बानी बसाल्न आग्रह गरे।
कार्यक्रमले विद्यार्थीहरूमा जिम्मेवारीबोध, सकारात्मक सोच र भविष्यप्रति आर्थिक योजना बनाउन प्रेरित गरेको आयोजकले जनाएको छ। संस्थाले आगामी दिनहरूमा पनि यस्ता वित्तीय साक्षरता अभिवृद्धि गर्ने कार्यक्रम निरन्तर सञ्चालन गर्ने प्रतिबद्धता व्यक्त गरेको छ।
ट्रेन्डिङ
सम्बन्धित
