कुचो बोकेर अभियान चलाएका खनाल अब सांसद

कैलाली- केपी खनालले १७ वर्षकै कलिलो उमेरमा ‘कान्छा अभियन्ता’को पहिचान बनाएका थिए । कुनै बेला उनी काठमाडौंका सडकमा कुचो बोकेर ‘म बदलिन्छु, मेरो देश बदलिन्छ’ भन्दै हिँड्थे । हातमा कुचो र मनमा देशप्रेम बोकेर हिँडेका खनालले सयौं युवालाई सामाजिक कार्यमा गोलबन्द गरे । राजधानी मात्र होइन, विकट बाजुराको बुढीगंगामा अनाथ बालबालिकाका लागि बालगृह निर्माण गर्नेदेखि अनेकौं सामाजिक सेवामा उनी अनवरत खटिए ।

किशोरावस्थादेखि नै देशमा केही गरौं भन्ने हुटहुटीले सामाजिक कर्ममा लाग्दै आएका खनालको काँधमा अहिले जिम्मेवारी थपिएको छ । सरसफाइ अभियानबाट माथि उठेर राज्य संयन्त्रकै सफाइ गर्ने अठोटका साथ उनले फागुन २१ को प्रतिनिधिसभा सदस्य निर्वाचनमा कैलाली-२ मा रास्वपाबाट उम्मेदवारी दिएका थिए । प्राय: सामाजिक कार्यमा देखिने खनालको धोको पूरा गराउन कैलाली-२ का नागरिकले मतदानमार्फत साथ दिए ।

उनी यस निर्वाचनमा ७ हजार १०८ मतान्तरले विजय भए । खनालले १९ हजार ५७ मत प्राप्त गर्दा उनका निकटतम् प्रतिद्वन्द्वी नागरिक उन्मुक्ति नेपालका पतिराम चौधरी ११ हजार ९४९ मतमा सीमित बने । यो क्षेत्रमा एमालेका सूर्यबहादुर थापा ७ हजार ८८६ मतसहित तेस्रो बने । जितको दाबेदार मानिएका नेपाली कांग्रेसका विजयबहादुर स्वाँरले ७ हजार २१३ मत मात्रै प्राप्त गरे । नेपाली कम्युनिस्ट पार्टीका नन्दबहादुर साउदले ४ हजार ३६९ मत ल्याए ।

२०५६ सालमा अछामको दुर्गम रामारोशनमा जन्मिएका खनाल सानै उमेरमा छिमेकी मुलुक भारतमा मजदुरी गर्न पुगेका थिए । भारतबाट फर्किएर अध्ययन सुरु गरेका खनाल ७ कक्षा पढ्दापढ्दै रेडियोकर्मी पनि बने । प्लस टू अध्ययनका क्रममा काठमाडौं छिरेका खनालले देशको राजधानी काठमाडौंमा फोहोरको डंगुर देखेपछि सुरु गरेका थिए, ‘क्लिन काष्ठमण्डप’ अभियान । त्यहीबेलादेखि उनको ‘कान्छा अभियन्ता’का चिनारी बनेको थियो ।

सामाजिक कर्ममा निस्वार्थ हेलिएका खनाल ‘नेसनल युथ आइकोन’ र ‘जनसेवा श्री’ जस्ता प्रतिष्ठित सम्मानको हकदार बने ।

सामाजिक कामले मात्रै समाजको दिगो रूपान्तरण सम्भव छैन भन्ने महसुस भएपछि खनालले राजनीतिको बाटो रोजेका हुन् । चुनावी अभियानका क्रममा धनगढीको सभालाई सम्बोधन गर्ने क्रममा खनालले भनेका थिए, ‘अब सुदूरपश्चिमका युवाले झाडु लिएर भारत र खाडीका सडक सफा गर्ने होइन, परिवर्तनको कलमले देशको नीति बदल्ने हो ।’ त्यो भावना र चाहनालाई पूरा गराउन जनताले उनलाई संसदीय यात्रा तय गराएका छन् ।

स्वच्छ छवि र युवा जोस देखिने खनाललाई लम्कीचुहा नगरपालिकाका स्थानीय युवा र मतदाताको ठूलो साथ थियो । उनको प्रेरणादायी पृष्ठभूमिले साधारण मानिसहरूलाई पनि आकर्षित गर्थ्यो । यद्यपि, राजनीतिक विरासतको अभाव तथा क्षेत्रीय समीकरणहरू उनका लागि केही प्रतिकूल थिए । तर भ्रष्टाचारको अन्त्य र सुशासनको जुन नारा उनले बोके त्यो कैलाली-२ का जनताले पत्याए । स्नातक तहसम्म अध्ययन गरेका खनाल पहिलोपटक संसदीय यात्रा हो । उनले आफ्नो क्षेत्रको सामाजिक, आर्थिक र शैक्षिक विकासका ठोस मुद्दा लिएर घरदैलो गए । जनता, मतदातासँग गरेका वाचा कसरी पूरा गर्छन्, उनको भावी कार्यशैलीले बताउनेछ ।