बीबीसीको डकुमेन्ट्री हटाउन आयोगको पत्राचार
काठमाडौं : निर्वाचन आयोगले जेन–जी आन्दोलनबारे बीबीसीले सार्वजनिक गरेको भिडियो डकुमेन्ट्री हटाउन निर्वाचन आयोगले प्रेस काउन्सिल नेपाललाई बिहीबार पत्राचार गरेको छ।
बीबीसी वल्र्ड सर्भिसले तयार गरेको वृत्तचित्र ‘सट लाइक द इनिमिजः इन्साइड नेपाल्स जेन–जी अपराइजिङ’ मा भदौ २३ र २४ गते भएको जेन–जी आन्दोलन दबाउन तत्कालीन प्रहरी महानिरीक्षक चन्द्रकुवेर खापुङले प्रदर्शनकारीमाथि गोली चलाउने आदेश दिएको दाबी गरिएको छ।
कार्यवाहक प्रमुख निर्वाचन आयुक्त रामप्रसाद भण्डारीले बिहीबार काउन्सिललाई पत्र पठाउँदै डकुमेन्ट्री हटाउने प्रक्रिया अघि बढाउन निर्देशन दिएको बताए। उनले डकुमेन्ट्री नहटाए कारबाही गर्ने चेतावनीसमेत दिए। ४१ मिनेट ३० सेकेन्डको भिडियोमा सुरक्षाकर्मीले अमानवीय बल प्रयोग गरेको उल्लेख गरिएको छ। निर्वाचनको पूर्वसन्ध्यामा मतदाता प्रभावित पार्नेगरी भिडियो सार्वजनिक भएको भन्दै टिप्पणी भइरहेका बेला आयोगले सक्रियता देखाएको हो।
आधिकारिक होइन : प्रहरी प्रवक्ता
प्रहरी प्रवक्ता प्रहरी नायब महानिरीक्षक अबिनारायण काफ्लेले डकुमेन्ट्रीमा उल्लेख गरिएको कागजात आधिकारिक नभएको बताए। उनले भिडियोलाई प्रहरीले गम्भीरतापूर्वक नलिएको बताउँदै सार्वजनिक टिप्पणी गर्न आवश्यक नठानेको बताए।
ट्रेन्डिङ
सम्बन्धित
