सुदूरपश्चिमलाई खाडी पठाउने होइन, समृद्ध बनाउने संकल्प चाहिन्छ: केपी खनाल

धनगढी- राष्ट्रिय स्वतन्त्र पार्टी (रास्वपा) का तर्फबाट कैलाली क्षेत्र नम्बर-२ का उम्मेदवार एवं अभियन्ता केपी खनालले सुदूरपश्चिम प्रदेशको विकासका लागि अब नीतिकै परिवर्तन आवश्यक रहेको बताएका छन्।

बुधबार धनगढीमा आयोजित रास्वपाको परिवर्तन उद्घोष सभालाई सम्बोधन गर्दै उनले यस्तो धारणा राखेका हुन्।

खनालले सुदूरपश्चिमलाई केवल भूगोलका रूपमा मात्र नहेरी यो क्षेत्र त्याग र सामर्थ्यको भूमि भएको बताए।

‘सुदूरपश्चिम केवल माटो मात्र होइन, यो खप्तडको तपस्या र कञ्चनजङ्गाको सुन्दरता हो,’ खनालले भने, ‘जब जब देशलाई अप्ठ्यारो पर्‍यो, यो क्षेत्रले रगतको खोला बगाएर देशलाई जोगाएको छ।’

सम्बोधनका क्रममा उनले सुदूरपश्चिमको प्रचुर सम्भावना र वर्तमान दुरावस्थाको तुलना गरे। उनले भने, ‘यो क्षेत्रमा १३ हजार मेगावाट विद्युत उत्पादन गर्ने क्षमता छ, टीकापुरदेखि कञ्चनपुरसम्मको उर्वर भूमिले देशलाई पाल्न सक्छ। तर विडम्बना, यहाँका नेताहरूले देश ओगटे, जनताको भविष्य ओगटेनन्।’

खनालले युवा पलायनको मुद्दालाई प्रमुखताका साथ उठाउँदै अबको लडाइँ व्यवस्था सुधार्नका लागि भएको उल्लेख गरे।

उनले थपे, ‘हाम्रा दाजुभाइलाई खाडी र कालापहाड पठाएर अर्काको देश बनाउने होइन, अब आफ्नै सुदूरपश्चिमलाई सुन्दर बनाउनुपर्छ। अबको सफाइ झाडुले मात्र होइन, नीति बदल्ने कलमले गर्नुपर्ने बेला आएको छ।’