धनगढीमा अवतरण हुन नसकेपछि श्रीएयरलाइन्सको जहाज काठमाडौँ फिर्ता

धनगढीः धनगढीका लागि काठमाडौँबाट उडेको श्रीएयरलाइन्सको जहाज मौसम बिग्रिएका कारण गन्तव्यमा अवतरण गर्न नसकेपछि मध्यरातमा पुनः काठमाडौँ फर्किएको छ।

धनगढी विमानस्थलमा अवतरणका लागि पटक–पटक प्रयास गरिए पनि अनुकूल अवस्था नबनेपछि जहाज राति करिब १२ बजे काठमाडौँ फर्काइएको हो। जहाज फर्किएपछि विमानस्थलमा केहीबेर यात्रुले असन्तुष्टि समेत जनाएका थिए।

एयरलाइन्सले टिकट फिर्ता गर्न चाहने यात्रुलाई रकम फिर्ता गरिने तथा यात्रा जारी राख्न चाहनेलाई मंगलबार बिहानको उडानमार्फत धनगढी पठाइने जानकारी दिएको छ।

उक्त जहाज सोमबार राति ९ः४५ बजे काठमाडौँबाट धनगढीतर्फ उडेको थियो। उडानमा चालक दलका सदस्यसहित ८० जना यात्रु सवार रहेका थिए।