कर्णालीमा ९६.४६ मत मात्रै खस्यो, ७ जनाले गरेनन् मतदान

सुर्खेत । बिहान ९ बजेदेखि सुरु भएको राष्ट्रिय सभा निर्वाचनको मतदान सम्पन्न भएको छ । जस अन्तर्गत कर्णालीमा ९६.४६ मत मात्रै खसेको प्रदेश निर्वाचन अधिकृत लालबहादुर गुरुङले रातोपाटीलाई बताए ।

उनका अनुसार, कुल १९८ मतदाता संख्यामध्ये १९१ मत खसेको छ । प्रदेश सभातर्फ ४० प्रदेश सभा सदस्यमध्ये ३९ जनाले मतदान गरेका छन् भने १ जनाले मत हालेनन् ।

स्थानीय तहतर्फ १५८ मतदाता संख्यामध्ये १५२ मत मात्रै खसेको उनले बताए । स्थानीय तहका ६ जना जनप्रतिनिधिहरूले मत खसालेका छैनन् ।

राष्ट्रिय सभा अन्तर्गत कर्णालीमा एक अन्य र एक महिला पदका लागि राष्ट्रिय सभा निर्वाचन भएको छ । जस अन्तर्गत कांग्रेस–एमाले गठबन्धन छ भने नेपाली कम्युनिस्ट पार्टी (नेकपा) एक्लै चुनावी मैदानमा छ ।कांग्रेसबाट अन्यतर्फ ललितजंग शाही र एमालेबाट महिलातर्फ मिनासिं रखाल उम्मेदवार छन् ।

नेकपाबाट अन्यतर्फ बुद्धिप्रसाद शर्मा र महिला कलस्टरमा अन्जु महतरा उम्मेदवार छन् । आजै मतगणना गरिने छ ।